अभिनेता एजाज खान त्याने आजवर साकारलेल्या वेगवेगळ्या भूमिकांमुळे चर्चेत असतो. बऱ्याचदा त्याची काही विधानही सोशल मीडियावर चर्चेत राहतात. नुकत्याच एका मुलाखतीत त्याने केलेल्या विधानामुळे त्याने पुन्हा एकदा नेटकऱ्यांचं लक्ष वेधून घेतलं आहे. अभिनेत्रींपेक्षा अभिनेत्यांना जास्त काळ इंडस्ट्रीत काम करता येत असं तो म्हणाला आणि त्याच्या विधानामुळे तो सोशल मीडियावर चर्चेत आहे.

त्याच्या नवीन रिलीज झालेल्या वेब शोच्या प्रोमोशनवेळी एजाजने इन्स्टंट बॉलिवूड या चॅनेलला मुलाखत दिली होती. यावेळी त्याला आणि दिव्यांका त्रिपाठीला जेव्हा तुम्ही टेलिव्हिजनवरून वेब शोसाठी काम करायला लागता तेव्हा तिथे काही अडथळा असतो का? असा प्रश्न विचारण्यात आला.

त्यावर दिव्यांकाने उत्तर दिलं कि,"अभिनेत्री एका काळापर्यंतच काम करू शकतात. मी माझं हे वाक्य अजून योग्य शब्दात मांडते. मी असं म्हणेन कि काही लोक मानतात कि मुली या इंडस्ट्रीत काही काळच काम करू शकतात. मग एका काळानंतर त्या थांबवतात आणि त्या त्यांच्या संसारात बिझी होतात." दिव्यांकाच्या या उत्तरावर एजाजनेही सहमती दर्शवत म्हंटलं कि, "अभिनेत्यांना अभिनेत्रींपेक्षा जास्त काळ काम करता येतं किंवा त्यांना जास्त काम करण्याची संधी या इंडस्ट्रीत मिळते. हो हे अजूनही आहे. हे कडवं आहे पण सत्य आहे. दुर्दैवाने किंवा सुदैवाने आम्हाला आमचं करिअर अजून पुढे न्यायला जास्त संधी मिळतात. पण हे खरं आहे." असं त्याने म्हंटलं.

सोशल मीडियावर एजाजचा हा व्हिडीओ व्हायरल झाला असून अनेकांनी कमेंट करत त्याच्या या विधानावर सहमती दर्शवली आहे.

दरम्यान एजाज आणि दिव्यांका यांची 'अद्रिश्यम- द इन्व्हिसिबल हिरोज' ही नवीन वेब शो नुकताच सोनी लिव्ह या ओटीटी प्लॅटफॉर्मवर रिलीज झाला आहे. या वेब शोमध्ये एजाज आणि दिव्यांका अंडरकव्हर इंटेलिजन्स अधिकाऱ्यांच्या भूमिकेत दिसणार आहेत.दर आठवड्याच्या गुरुवारी आणि शुक्रवारी रात्री ८ वाजता या वेब शोचा नवीन एपिसोड सोनी लिव्ह या ओटीटी प्लॅटफॉर्मवर प्रेक्षकांना पाहायला मिळेल. ११ एप्रिल २०२४ ला शोचा पहिला एपिसोड रिलीज करण्यात आला.