पुणे ः कॉर्पोरेट कंपनीमध्ये काम करणाऱ्या एका तरुणीचा मोबाईल खरेदी करण्याचा बहाणा करून सायबर गुन्हेगाराने तरुणीच्या मोबाईलसह सव्वा लाख रुपयांची फसवणूक केली. याप्रकरणी सायबर पोलिसांनी अनोळखी व्यक्तींविरुद्ध गुन्हा दाखल केला आहे. 

 ताज्या बातम्यांसाठी डाऊनलोड करा ई-सकाळचे ऍप

याप्रकरणी महंमदवाडी येथील 21 वर्षीय तरुणीने सायबर पोलिसांकडे फिर्याद दिली. सायबर पोलिस ठाण्याचे वरिष्ठ पोलिस निरीक्षक जयराम पायगुडे यांनी दिलेल्या माहितीनुसार, फिर्यादी या शहरातील एका कॉर्पोरेट कंपनीमध्ये काम करतात. त्यांच्याकडील महागडा मोबाईल त्यांना विकायचा होता. त्यासाठी त्यांनी त्यांच्या 90 हजार रुपये किमतीच्या मोबाईलची ओएलएक्‍स या ऑनलाइन वस्तू खरेदी-विक्री करणाऱ्या संकेतस्थळावर जाहिरात केली.

बारामतीकरांनो सावधान, आता कोरोनाच्या समूह संसर्गाचा धोका 

त्यानुसार, सहा जून रोजी त्यांना एका अनोळखी व्यक्तीने संपर्क साधला. त्यांना फिर्यादीचा मोबाईल पसंत पडला. त्यानंतर त्याने फिर्यादीचा विश्‍वास संपादन करून त्यांचा मोबाईल कुरिअरद्वारे मागवून घेतला. त्यानंतर त्याने फिर्यादी 90 हजार रुपयांची रक्कम पाठविण्यापूर्वी त्याने दिलेल्या बॅंक खात्यावर 30 हजार रुपये जमा करण्यास सांगितले. त्यानुसार, तरुणीने 30 हजार रुपये संबंधित खात्यावर जमा केले. त्यानंतर एक लाख 20 हजार रुपयांची रक्कम मिळावी, यासाठी संबंधित व्यक्तीकडे पाठपुरावा केला, मात्र तिला प्रतिसाद मिळाला नाही. आपली फसवणूक झाल्याचे लक्षात आल्यानंतर तिने पोलिसांकडे तक्रार दाखल केली. त्यानुसार, पोलिसांनी अनोळखी व्यक्तींविरुद्ध गुन्हा दाखल केला आहे.

- ताज्या बातम्यांसाठी डाऊनलोड करा ई-सकाळचे ऍप

(Edited by : Sagar Diliprao Shelar)