पिंपरी - महापालिकेची रुग्णालये व दवाखान्यांसाठी सुमारे साडेअकरा कोटी रुपयांची औषधे व वैद्यकीय साहित्य खरेदी करण्यात येणार आहे. सर्वसामान्य रुग्णांना त्याचा लाभ मिळणार आहे.

पिंपरीतील संत तुकारामनगरमध्ये महापालिकेचे यशवंतराव चव्हाण स्मृती रुग्णालय (वायसीएम) आहे. त्याच पद्धतीची सेवा शहर परिसरातील रुग्णांना मिळावी व वायसीएम रुग्णालयावरील ताण कमी व्हावा, यासाठी चिंचवड गावातील तालेरा आणि पिंपरी गावातील जिजामाता या रुग्णालयांचा विस्तार करण्याचे नियोजन महापालिकेने  केले आहे. त्यापैकी तालेराचे विस्तारीकरण झालेले असून, जिजामाताचे काम प्रगतिपथावर आहे. शिवाय महापालिकेची भोसरी, सांगवी, यमुनानगर, आकुर्डी, थेरगाव आदी रुग्णालये व दवाखानेही आहेत. त्या ठिकाणी उपचार घेणाऱ्या रुग्णांना काही औषधे मिळत नव्हती. रुग्ण व त्यांच्या नातेवाइकांना ती औषधे खासगी मेडिकलमधून घ्यावी लागत होती. त्यामुळे महापालिकेच्या स्थायी समिती सभेने औषधे खरेदीचा निर्णय घेतला आहे. 

दोन वर्षांतील खरेदी
महापालिकेची रुग्णालये व दवाखाने यांसाठी औषधे व वैद्यकीय साहित्य खरेदीसाठी औषधे निविदा समिती स्थापन केलेली आहे. या समितीने शिफारस केल्यानंतर औषधे खरेदीच्या निविदा मागविल्या जातात. दोन वर्षांपूर्वी चार निविदा मागविल्या होत्या. त्यानुसार ॲलोपॅथीची ८०९, शस्त्रक्रियेसाठीचे साहित्य ४४९, आयुर्वेदिक औषधे १९८ आणि दंतविषयक औषधे व साहित्य २११ असे एकूण एक हजार ६६७ प्रकारची औषधे व साहित्य खरेदी केली होती. तसेच गेल्या आर्थिक वर्षात ७५ हजार ४० हजार ५८१ रुपयांची औषधे खरेदी केली आहे. त्यासह चालू आर्थिक वर्षात औषधे व वैद्यकीय साहित्य खरेदीसाठी ११ कोटी ५० लाख रुपये महापालिका स्थायी समितीने मंजूर केलेले आहेत.