पुणे : सिंहगड रस्त्यावर उभारण्यात येणाऱ्या उड्डाणपुलासाठी अर्थसंकल्पात १३५ कोटी रुपयांची तरतूद करण्यास मंगळवारी स्थायी समितीने मान्यता दिली. पुलाच्या कामासाठी ३६ ते ३८ महिने लागणार आहेत, अशी माहिती स्थायी समितीचे अध्यक्ष हेमंत रासने यांनी दिली.

पालकमंत्री अजित पवार यांनी महामेट्रोला खडकवासला ते स्वारगेट दरम्यान मेट्रो प्रकल्पाचा आराखडा तयार करण्याचा सूचना दिल्या आहेत. मेट्रोकडून तसा प्रस्ताव तयार करण्यात येत आहे. भविष्यात होणाऱ्या या रस्त्यावरील मेट्रो मार्गाला उड्डाणपुलाचा अडथळा होऊ नये, अशा दृष्टीने या पुलाचे नियोजन करण्यात येणार असल्याचे रासने यांनी सांगितले.

दरम्यान, माहिती-तंत्रज्ञानाचा उपयोग महापालिकेच्या कारभारात करून घेण्यासाठी राज्य सरकारच्या आदेशावरून दर महिना सहा रुपये खर्च करून दोन सल्लागार नेमण्याच्या प्रस्तावाला देखील समितीच्या बैठकीत मान्यता देण्यात आली.

ही कामे होणार

• २१२० मीटरचा पूल उभारण्यात येणार

• उड्डाणपुलाला जोडणारे काही पूल बांधण्यात येणार

• यामध्ये राजाराम पूल चौकामध्ये स्वारगेटकडे जाणाऱ्या वाहनांसाठी ४९५ मीटरचा पूल

• इंडियन ह्यूम ते इनामदार चौक या पुलाची लांबी १५४० मीटर असणार

यासाठी उड्डाणपूल

सिंहगड रस्त्यावरील धायरी, वडगाव, नऱ्हे, नांदेड, खडकवासला या भागांचा झपाट्याने विकास होत आहे. त्यामुळे या भागातील वाहतुकीचा प्रश्न निर्माण झाला आहे. या रस्त्याला पर्यायी मोठा रस्ता नसल्यामुळे उड्डाणपुलाचे काम हाती घेण्यात येणार आहे.

''शिवणे व उत्तमनगर या गावाची पाणीपट्टी माफ करणे, रामटेकडी येथील सांडपाणी प्रक्रिया प्रकल्पाची देखभाल-दुरुस्ती करणे, डॉ. नायडू हॉस्पिटल येथे ऑक्सिजन प्लांट उभारणी आदी प्रस्तावांना समितीच्या बैठकीत मान्यता देण्यात आली.''

- हेमंत रासने, अध्यक्ष, स्थायी समिती, पुणे महापालिका