राज्याला हादरवून टाकणाऱ्या उरण हत्याकांडानंतर इंदापूर येथून एक धक्कादायक प्रकार समोर आला आहे. एका शाळेतील कारकूनाने अल्पवयीन मुलीवर अतिप्रसंग करण्याचा प्रयत्न केला. इतकेच नाही तर मुलीने प्रतिकार केल्यावर तिला कीटकनाशक पाजण्यात आलं. या पीडित १४ वर्षीय मुलीचा उपचारादरम्यान मृत्यू झाला आहे. या घटनेमुळे इंदापूर शहरात एकच खळबळ उडाली आहे.

मिळालेल्या माहितीनुसार, शाळेतील कारकूनाने इयत्ता ९वीत शिकणाऱ्या १४ वर्षीय मुलीवर तिच्या घरी जाऊन अतिप्रसंग करण्यात प्रयत्न केला. पीडितेने विरोध केला असता आरोपीने तिला कीटकनाशक पाजून बळजबरी केली. या घटनेनंतर मुलीवर अकलूजमधील खासगी रुग्णालयात उपचार सुरू होते. मात्र या मुलीची मृत्यूशी झुंज अपयशी ठरली आणि उपचारादरम्यान या मुलीचा मृत्यू झाला.

या घटनेनंतर आरोपीला अटक करण्यात आले असून त्याचे नाव रणजित असे सांगितले जात आहे. आरोपी रणजितने घरी येऊन अंगलगट करण्याचा प्रयत्न केला, बळजबरी करण्याचा प्रयत्न केला. त्यास आपण प्रतिकार केल्यानंतर त्याने कीटकनाशक पाजलं, अशी फिर्याद मुलीने दिली. यानंतर पोलिसांनी आरोपी विरोधात बालकाचे लैंगिक अपराधापासून संरक्षण अधिनियम 2012 कलमानुसार गुन्हा दाखल केला आहे. मात्र आता मुलीचा उपचारादरम्यान मृत्यू झाल्याने आरोपीविरोधात खूनाचा गुन्हा दाखल करण्यात येणार आहे.

उरणमध्ये काय झालं?

उरणमध्ये एक २० वर्षीय तरूणी बेपत्ता झाली होती. ती बेलापुरमध्ये एका सरकारी कंपनीत काम करायची. ती घरी परत न आल्याने वडिलांनी पोलिसात तक्रार दाखल केली. त्यानंतर पोलिसांनी तिचा शोध सुरु केला होता. अखेर तिचा मृतदेह रेल्वेस्टेशन जवळ आढळून आला होता. त्यानंतर या प्रकरणातील प्रमुख आरोपी दाऊद शेखला मंगळवारी कर्नाटकच्या गुलबर्गा येथून अटक करण्यात आली होती. शेख याला आज मुंबईतील कोर्टामध्ये हजर करण्यात आले होते. त्यानंतर शेखला कोर्टाने सात दिवसांची पोलीस कोठडी सुनावली आहे.