पुणे - पुणे-मुंबई रेल्वे मार्ग पावसाळ्यात अधिक सुरक्षित करण्यासाठी रेल्वेने घाटात १४५ ठिकाणी सीसीटीव्ही कॅमेरे बसविण्याचे काम हाती घेतले आहे. तसेच, धोकादायक ठरू शकणाऱ्या तब्बल ५९४ ठिकाणच्या दरडी सुरक्षित केल्या जाणार आहेत. रेल्वे प्रशासनातर्फे यातल्या काही दरडी हटविल्या जातील, तर काहींना जाळ्या लावून सुरक्षित केल्या जात आहे.

उपयोगात नसलेल्या रूळाची एक प्रकारे भिंत बांधून बोगद्याला आतून सुरक्षा दिली आहे. पावसाळ्यात दरवर्षी लोणावळा-कर्जत रेल्वे मार्गावर दरडी कोसळून रेल्वे वाहतूक ठप्प होते, तर काही वेळा मोठे दगड रूळावर आल्याने रूळांचे मोठे नुकसान होते. या पार्श्वभूमीवर खबरदारीचा उपाय म्हणून रेल्वे प्रशासनाने जवळपास ५८ बोगद्यात १४५ सीसीटीव्ही लावण्याचा निर्णय घेतला असून, पैकी ८७ कॅमेरे बसविले गेले आहेत. ज्या ठिकाणी मोठ्या प्रमाणात दरडी कोसळतात, त्या ठिकाणी रूळांचे जाळे उभे केले आहे. त्यामुळे कोसळणाऱ्या दरडी रूळांना अडकून पडतील. त्याला ट्रॅकवर येण्यास मज्जाव होईल. परिणामी, रेल्वे मार्ग बाधित होणार नाही.

नियंत्रण कक्षाचा मोठा आधार

पावसाळ्यात दरवर्षी बोरघाटात मोठ्या प्रमाणात पाऊस पडतो. अंधारात दरडीवर नजर ठेवणे किंवा पडल्यावर त्याची नेमकी जागा शोधून काढणे हे खूप अवघड असते. २८ किमीच्या मार्गावर ५८ बोगदे व देशातल्या लोहमार्गांपैकी सर्वांत तीव्र उतार व चढण असलेला हा भाग आहे. येथे काम करणे खूप आव्हानात्मक आहे. त्यामुळे रेल्वे प्रशासनाने ५८ बोगद्याच्या दोन्ही बाजूला सीसीटीव्ही कॅमेरे बसविले आहेत. त्यावर मुंबई येथील नियंत्रण कक्षातून नजर ठेवली जाते.

बोरघाटातील ५९४ दरडींचे स्क्रीनिंग

ज्याप्रमाणे मावळे दोरीचा आधार घेत किल्ल्यावर चढत वा उतरत, त्याप्रमाणे रेल्वेचे हिलगॅंगच्या पथकातील कर्मचारी दोरीचा आधार घेत घाटाच्या बाजूस दऱ्या कपाऱ्यात उतरतात. तिथून धोकादायक दरडी पाडली जाते. जेणेकरून पावसाळ्यात त्या ट्रॅकवर येऊ नये. आतापर्यंत बोरघाटातील ५९४ ठिकाणच्या दरडीचे स्क्रीनिंग केले आहे. त्यातल्या काही दरडी हटविल्या जातील, तर काही जाळ्यांनी सुरक्षित केल्या जाणार आहेत.

दरडी कोसळून रेल्वेसेवा बाधित होऊ नये, याकरिता रेल्वे प्रशासनाने वेगवेगळ्या पातळीवर उपाययोजना केल्या आहेत. यात ‘सीसीटीव्ही’पासून ते हिलगॅंगला प्रशिक्षण देण्यापर्यंतचा समावेश आहे. प्रवासी सुरक्षितता डोळ्यांसमोर ठेवून आम्ही उपाययोजना करीत आहोत.

- शिवाजी सुतार, मुख्य जनसंपर्क अधिकारी, मध्य रेल्वे मुंबई