पुणे : पंतप्रधान आवास योजनेतील घरे निविदा काढून बांधण्याऐवजी ‘पीपीपी’ तत्त्वावर (पब्लिक, प्रायव्हेट, पार्टनरशिप) बांधण्याचा निर्णय घेतला आहे. यानुसार शहरात पंधरा हजार घरे बांधण्याचे नियोजन करण्यात आले असून त्यासाठी फुरसुंगी आणि लोहगाव येथील सुमारे चाळीस एकर गायरान जागेची मागणी महापालिकेने जिल्हा प्रशासनाकडे केली आहे.

महापालिकेने या योजनेतंर्गत पहिल्या टप्प्यात खराडी, सिंहगड रस्त्यावरील वडगाव आणि हडपसर येथे २९१८ घरे बांधण्याचा प्रकल्प हाती घेतला आहे. त्यासाठी महापालिकेने निविदा काढून हे काम दिले आहे. त्यामुळे बांधकाम व्यावसायिक आणि लाभार्थी यांच्यामध्ये महापालिकेला मध्यस्थीची भूमिका राबवावी लागत आहे. तसेच महापालिकेला त्यासाठी निधी देखील उपलब्ध करून द्यावा लागत आहे. त्यामुळे योजना राबविताना अनेक अडथळे येत आहेत.

दरम्यान ही योजना पीपीपी मॉडेलच्या माध्यमातून राबविण्यासही मध्यंतरी केंद्र सरकारने परवानगी दिली आहे. त्यामुळे महापालिकेने या मॉडेलचा वापर करून शहरात पंधरा हजार घरे बांधण्याचा निर्णय घेतला आहे. त्यासाठी महापालिकेच्या ताब्यात आलेल्या बाणेर-बालेवाडी भागातील दहा एकर जागा, तर फुरसुंगी आणि लोहगाव येथील चाळीस एकर जागा अशी सुमारे ५० एकर जागेवर १५ हजार घरे बांधण्याचे नियोजन केले आहे. त्यासाठी फुरसुंगी आणि लोहगाव येथील गायरान जागेची मागणी महापालिकेने केली आहे.

• या येाजनेसाठी महापालिकेकडून २० हजार लाभार्थ्यांची यादी चार वर्षांपूर्वीच निश्‍चित करण्यात आली आहे

  त्यापैकी सुमारे ३ हजार घरांचे बांधकाम महापालिकेने निविदा काढून दिले आहे

• आता पंधरा हजार घरे बांधण्याचे काम पीपीपी तत्त्वावर निविदा मागवून देण्यात येणार आहे

• पीपीपी तत्त्वावर महापालिका केवळ विकसक यांना जागा उपलब्ध करून देणार आहे

• त्यासाठी निविदा काढून जो कमी दरात आणि सर्वाधिक सदनिका उपलब्ध करून देईल, त्यांनाच काम देणार

• म्हाडा ज्या दरात सदनिका उपलब्ध करून देते, त्याच दराने संबंधित विकसकाने महापालिकेने निश्‍चित केलेल्या लाभार्थ्यांना घरे उपलब्ध करून देण्याचे बंधन राहणार आहे.

''पंतप्रधान आवास योजनेमध्ये गायरान जागा वापरण्यास केंद्राने परवानगी दिली आहे. त्यामुळे फुरसुंगी आणि लोहगाव येथील गायरान जागेची मागणी महापालिकेने जिल्हाधिकाऱ्यांकडे मागणी केली आहे. त्यांच्याकडून तत्त्वतः मान्यता मिळाली आहे. पीपीपी या तत्त्वावर घरे बांधण्यात येणार आहे.''

- युवराज देशमुख, अधिक्षक अभियंता, बांधकाम विकसक, पुणे महापालिका