लोणी काळभोर (पुणे) : पॅरोलवर येरवडा कारागृहातून काही दिवसाकरीता बाहेर आलेल्या एका अट्टल गुन्हेगाराने कदमवाकवस्ती (ता. हवेली) येथील सोळा वर्षीय अल्पवयीन मुलीला जीवे मारण्याची धमकी देत, तिचा विनयभंग केल्याचा धक्कादायक प्रकार गुरुवारी (ता.७) दुपारी उघडकीस आला आहे.  

पीडीत मुलीच्या नातेवाईकांनी दिलेल्या तक्रारीनुसार, लोणी काळभोर पोलिसांनी सचिन सुभाष कदम ( वय. ४५, रा. लोणी स्टेशन, कदमवाकवस्ती, लोणी काळभोर, ता. हवेली) या अट्टल गुन्हेगारांच्या विरोधात विनयभंगाचा गुन्हा दाखल केला आहे. सचिन कदम याच्यावर लोणी स्टेशन येथील एका गुन्हेगारांचा खून केल्याचा आरोप आहे. गुन्हा दाखल होण्यापूर्वीच आरोपी फरार झाला असून, आरोपींला अटक करण्यासाठी पोलिस पथक रवाना झाले असल्याची माहिती लोणी काळभोरचे वरिष्ठ पोलिस निरीक्षक सूरज बंडगर यांनी दिली आहे. 

- अकरावीच्या विद्यार्थ्यांनो, 'प्रथम येणाऱ्यास प्रथम प्राधान्य' फेरीद्वारे होणार अॅडमिशन​

लोणी काळभोर पोलिसांनी दिलेल्या माहितीनुसार, पीडीत मुलगी गुरुवारी दुपारी साडे बारा वाजनेच्या सुमारास एकटीच घरी असल्याचे पाहून, सचिन कदम याने संबधित मुलीच्या घरात प्रवेश केला. तसेच तिच्याशी लगट करण्याचा प्रयत्न सुरु केला. यावेळी संबधित मुलीने ओरडण्याचा प्रयत्न केला असता, सचिन कदम याने संबधित मुलीचे तोंड हाताने दाबले. तसेच तिला जीवे मारण्याची धमकीही दिली. मात्र मुलीने सचिनच्या हातातून निसटण्याचा प्रयत्न करताच, सचिनने घराबाहेर पळ काढला. तसेच घरापासून पळून जाताना, पीडित मुलीच्या घराबाहेर उभी असलेल्या दुचाकीचा आरसाही फोडला. 

- शिक्षक-शिक्षकेतर कर्मचाऱ्यांसाना मिळणार 'विमा कवच' तेही 50 लाख रुपयांचे​

दरम्यान सचिन दूर गेल्याची खात्री पटताच, मुलीने आपल्या नातेवाईकांशी फोनवरुन संपर्क साधून घडलेल्या घटनेची माहिती दिली. यावर पीडित मुलीच्या नातेवाईकांनी तात्काळ लोणी काळभोर पोलिसात जाऊन, सचिन कदम याच्या विरोधात तक्रार दाखल केली. पुढील तपास पोलिस निरीक्षक सूरज बंडगर यांच्या मार्गदर्शनाखाली पोलिस उपनिरीक्षक संदीप बोरकर करत आहेत.

- पुण्यातील इतर बातम्या वाचण्यासाठी क्लिक करा

(Edited by: Ashish N. Kadam)