कात्रज : कात्रज कोंढवा रस्त्यावर वारकऱ्यांचा (Warkari) टेम्पो पलटी झाल्याची घटना घडली असून यामध्ये २० वारकऱ्यांना दुखापत झाली आहे. या प्रकरणी टेम्पो चालकाविरोधात भारती विद्यापीठ पोलिसांत (Bharti University Police) गुन्हा दाखल करण्यात आला आहे. ही घटना रविवारी (ता. ३०) रात्री उशिरा घडली.

याबाबत प्रयागबाई नारायण बोखारे (वय ७२, रा. फुकटगाव, जि. परभणी) यांनी फिर्याद दिली आहे. त्यांनी दिलेल्या फिर्यादीनुसार, टेम्पोचालक नवनाथ लक्ष्मणराव चाेपडे (रा. धार, जि. परभणी) याच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, पालखी सोहळ्यात सहभागी झालेल्या परभणी जिल्ह्यातील वारकऱ्यांना घेऊन टेम्पो मुक्कामी निघाला होता. कात्रज-कोंढवा रस्त्यावरील शिवशंभोनगर परिसरात गल्ली क्रमांक १ येथे टेम्पोचालक चोपडे याचे नियंत्रण सुटले. टेम्पो उलटून टेम्पोतील २० वारकऱ्यांना दुखापत झाली.

तक्रारदार प्रयागबाई बोखारे यांच्या डोक्याला, हाताला आणि मनगटालाही दुखापत झाली आहे. घटनेची माहिती मिळताच भारती विद्यापीठ पोलिस ठाण्याचे वरिष्ठ पोलीस निरीक्षक दशरथ पाटील यांनी घटनास्थळी धाव घेतली. जखमी वारकऱ्यांना तातडीने रुग्णालयात दाखल करून त्यांच्यावर उपचार करण्यात आले. पोलिस पुढील तपास करत आहेत.