पिंपरी - पिंपरी-चिंचवड महापालिका हद्दीमध्ये मेट्रोचे २१५ खांब बांधून पूर्ण झाले असून, आणखी ६७ खांबांसाठी पायाचे काम झाले आहे. नाशिक फाटा उड्डाण पुलाजवळील परिसर तसेच काही चौकांतील भागांमध्ये मेट्रोच्या खांबांसाठी पाया घेण्याचे काम अद्याप शिल्लक आहे.

मेट्रोच्या कामामध्ये स्थापत्यचे काम जादा वेळ घेणारे असते. त्यामध्ये खांबांसाठी पाया घेऊन त्याची उभारणी करण्याला अधिक कालावधी लागतो. गेल्या दीड वर्षात मेट्रोचे दोनशेपेक्षा अधिक खांब उभारण्यात आले. या भागातील सहा स्थानकांसाठी खांब बांधले असून, चार स्थानकांच्या पहिल्या टप्प्यातील (कॉनकोर्स लेव्हल) आर्म बांधण्याचे काम हाती घेण्यात आले आहे.

खांबांवरील पूल (व्हायाडक्‍ट) बांधण्यासाठी तीन गर्डर लाँचरच्या साह्याने स्पॅन बसविण्यात येत आहेत. चौथा गर्डर लाँचर उभारण्यात येत असून त्याचे काम खराळवाडीपासून महापालिका भवनाच्या दिशेने लवकरच सुरू करण्यात येईल. आतापर्यंत ९२ स्पॅन पूर्ण झाले आहेत. त्यावर लोहमार्ग टाकण्याचे काम येत्या महिन्याभरात सुरू करण्यात येणार आहे. 

हॅरिस पुलाजवळ मुळा नदीच्या पात्रात चार खांबासाठी पाया घेण्यात आला असून पावसाळ्यापूर्वी पाचव्या खांबासाठी पाया घेण्यात येईल. नदीपात्रात एकूण पाच खांब असून ते पावसाळ्यापूर्वी हॅरिस पुलाच्या उंचीपर्यंत बांधण्याचे नियोजन महामेट्रोने केले आहे. पावसाळ्यामध्ये त्याची उंची आणखी साडेपाच मीटरने वाढविण्यात येईल. डिसेंबरपर्यंत या मार्गावर मेट्रो सुरू करण्याच्या उद्देशाने ही सर्व कामे वेगाने करण्यात येत असल्याचे महामेट्रोच्या सूत्रांनी सांगितले.