Pune News : ‘ई-प्रिझन्स’ प्रणालीअंतर्गत राज्यातील विविध कारागृहांमधील सुमारे २२ हजार कैद्यांनी ई-मुलाखत सुविधेचा लाभ घेत कुटुंबीयांशी संवाद साधला. ई-मुलाखत सुविधेमुळे कैद्यांना कुटुंबीयांशी संवाद साधणे शक्य झाले आहे.
अतिरिक्त पोलिस महासंचालक व महानिरीक्षक (कारागृह व सुधारसेवा) अमिताभ गुप्ता यांच्या प्रयत्नातून कैद्यांना कुटुंबीयांशी संवाद साधण्यासाठी ‘ई-मुलाखत’ सुविधा सुरू करण्यात आली आहे. राज्यात १ जानेवारी ते ३१ मार्च या कालावधीत तळोजा मध्यवर्ती कारागृहातील तीन हजार ४७८ कैदी,
ठाणे मध्यवर्ती कारागृहातील तीन हजार ४३८, नागपूर मध्यवर्ती कारागृहातील तीन हजार ४२५, मुंबई मध्यवर्ती कारागृहातील एक हजार ७९७, नाशिकरोड मध्यवर्ती कारागृहातील एक हजार ५५९, कल्याण जिल्हा कारागृहातील एक हजार ४४२, येरवडा मध्यवर्ती कारागृहातील एक हजार २२८ आणि इतर कारागृहांसह एकूण २१ हजार ९६३ पुरुष व महिला कैद्यांनी ई-मुलाखत सुविधेचा लाभ घेतला.
कुटुंबीय, नातेवाईक, वकील यांना कैद्यांशी ई-मुलाखत म्हणजे चर्चा करण्यासाठी ‘ई-प्रिझन्स’ प्रणालीवर पूर्वनोंदणी करता येते. त्यामुळे नातेवाइकांना इच्छित दिवशी आणि वेळी कैद्यांशी चर्चा करता येते. त्यामुळे कैद्यांच्या नातेवाइकांचा या सुविधेचा लाभ घेण्याकडे कल आहे. तसेच, प्रत्यक्ष भेटण्यासाठी येण्याच्या खर्चात बचत होत आहे. ई-मुलाखतीस कैद्यांच्या नातेवाईकांकडून चांगला प्रतिसाद मिळत असल्याचे सांगण्यात आले.
राज्यातील कारागृहांमध्ये शिक्षा भोगत असलेल्या पाकिस्तानमधील कैदी आणि दहशतवादी कारवायांमधील कैद्यांना सुरक्षेच्या कारणास्तव या सुविधेचा लाभ दिला जात नाही. राज्यातील कारागृहांमध्ये सहाशेहून अधिक विदेशी कैदी आहेत. या सुविधेमुळे विदेशी कैद्यांनाही त्यांच्या कुटुंबीयांशी संवाद साधणे शक्य झाले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.