पुणे - पुणे शहरात गुरुवारी (Thursday) (ता.६) एकाच दिवसात २ हजार २८४ नवे कोरोना रुग्ण (Corona Patients) आढळून आले आहेत. याउलट दिवसभरात शहरातील केवळ ८० जण कोरोनामुक्त (Coronafree) झाले आहेत. पुणे जिल्ह्यातील (Pune District) दिवसातील नवीन रुग्णांची संख्या ही ३ हजार ६४८ इतकी आहे. दरम्यान, जिल्ह्यात दिवसात चार जणांचा कोरोनाने मृत्यू (Death) झाला आहे. एकूण मृत्यूमध्ये पुणे शहरातील तीन आणि पिंपरी चिंचवडमधील एक मृत्यू आहे. रुग्ण संख्या वाढत असली पुणेकरांनी घाबरून न जाता अधिकाधिक खबरदारी घ्यावी, असे आवाहन जिल्हा प्रशासनाच्यावतीने करण्यात आले आहे.

पुण्यातील दिवसातील नवीन रुग्णांमध्ये बुधवारच्या (ता. ५) तुलनेत गुरुवारी (ता.६) पावणे पाचशेनी वाढ झाली आहे. जिल्ह्यात नवीन रुग्णांच्या संख्येच्या तुलनेत कोरोनामुक्त रुग्णांचे प्रमाण खुपच अल्प असल्याचे जिल्हा आरोग्य विभागाच्यावतीने प्रसिद्ध करण्यात आलेल्या कोरोना आकडेवारी अहवालात दिसून आले आहे.

जिल्ह्यातील दिवसातील एकूण नवीन रुग्णांमध्ये पुणे शहरातील २ हजार २८४ रुग्णांबरोबरच पिंपरी चिंचवडमधील ८१७, जिल्हा परिषद कार्यक्षेत्रातील ३६९, नगरपालिका हद्दीतील ६६ आणि कॅंटोन्मेंट बोर्ड क्षेत्रातील ११२ रुग्णांचा समावेश आहे. दिवसात पुणे शहरातील ८० जणांबरोबरच पिंपरी चिंचवडमधील २२, जिल्हा परिषद कार्यक्षेत्रातील २७, नगरपालिका हद्दीतील ८ आणि कॅंटोन्मेंट बोर्ड क्षेत्रातील ३३ जण आहेत.

सद्यःस्थितीत जिल्ह्यात एकूण ११ हजार ६७५ सक्रिय कोरोना रुग्ण आहेत. एकूण रुग्णांपैकी शहर व जिल्ह्यातील विवध रुग्णालयांमध्ये ९०५ रुग्णांवर उपचार सुरु आहेत. उर्वरित १० हजार ७७० जण हे गृहविलगीकरणात आहेत.