पुणे: प्रधानमंत्री आवास योजनेच्या कामासाठी महापालिकेने केलेली तरतूद अपुरी पडत असल्याने २७ कोटी ६८ लाख रुपये वर्गीकरणाद्वारे उपलब्ध करून दिले आहेत. यामुळे आर्थिकदृष्ट्या दुर्बल घटकांसाठी सुरू असलेल्या गृह प्रकल्पांच्या बांधकामाला पुरेसा निधी उपलब्ध झाला आहे. आज या प्रस्तावाला स्थायी समितीने मान्यता दिली, असे अध्यक्ष हेमंत रासने यांनी सांगितले.

खराडी, वडगाव खुर्द येथे प्रत्येकी एक आणि हडपसर येथे तीन असे पाच गृह प्रकल्प बांधले जात आहेत. यामध्ये २ हजार ९१८ सदनिका असणार आहेत. त्यासाठी ७० कोटी रुपयांची तरतूद अंदाजपत्रकात करण्यात आली होती. त्यापैकी ६ जानेवारी अखेर सुमारे ६२ कोटी ८१ लाख रुपये रक्कम खर्ची पडली आहे. हे काम वेळेत पूर्ण करण्यासाठी चालू आर्थिक वर्षात आणखी ३२ कोटी रुपयांची तरतूद आवश्‍यक आहे. त्यासाठी नदी सुधारणा प्रकल्पातील २० कोटी आणि शहर अभियंता कार्यालयाकडे उपलब्ध असणाऱ्या १० कोटी ९३ लाख रुपयांच्या तरतुदीपैकी ७ कोटी ६८ लाख रुपयांची रक्कम वर्गीकरणाद्वारे उपलब्ध करून देण्यात आली आहे.