पुणे - पुणे जिल्ह्यात यंदा ग्रामपंचायत करापोटी २७१ कोटी ६८ लाख दोन हजार रुपयांची वसुली झाली आहे. यामध्ये २३३ कोटी २५ लाख ३८ हजार रुपयांच्या घरपट्टीचा, तर ३८ कोटी १२ लाख ६४ हजार रुपयांच्या पाणीपट्टीचा समावेश आहे. ग्रामपंचायत कर वसुलीचे हे प्रमाण ८०.५८ टक्के आहे.

गावांच्या विकासासाठी निधी उपलब्ध व्हावा आणि गावांना पायाभूत सुविधा निर्माण करता याव्यात म्हणून पंचायतराज संस्थांना विविध प्रकारच्या कर वसुलीचे अधिकार देण्यात आले आहेत. यानुसार ग्रामपंचायतींसाठी घरपट्टी आणि पाणीपट्टी हे दोन कर खूप महत्त्वपूर्ण असतात. या दोन्ही करांच्या वसुलीवरच गावांच्या विकासाचे भवितव्य अवलंबून असते. जिल्ह्यातील ग्रामपंचायत कराची मार्च २०१८ अखेर ५३ कोटी २४ लाख ३५ हजार रुपयांची थकबाकी होती. त्यात १ एप्रिल २०१८ ते ३१ मार्च २०१९ या आर्थिक वर्षातील २८७ कोटी ९० लाख ८० हजार रुपयांची भर पडली. यानुसार ३३२ कोटी ६८ लाख ३६ हजार रुपयांच्या कर वसुलीचे आव्हान ग्रामपंचायत विभागापुढे होते.