पुणे : इयत्ता अकरावीसाठी प्रवेश प्रक्रियेतंर्गत आतापर्यंत जवळपास २९ हजार ५५६ विद्यार्थ्यांनी प्रवेश घेतला आहे. अकरावीच्या  पहिल्या नियमित फेरीतंर्गत निवड झालेल्या विद्यार्थ्यांपैकी २३ हजार ५७९ विद्यार्थ्यांनी सोमवारपर्यंत प्रवेश निश्चित केला आहे. आता पहिल्या फेरीतील विद्यार्थ्यांना प्रवेशासाठी मंगळवारपर्यंत (ता.३१) मुदतवाढ दिली आहे.

अकरावीच्या ऑनलाइन प्रवेश प्रक्रियेतंर्गत पहिल्या यादीतील विद्यार्थ्यांना प्रवेशासाठी सोमवारपर्यंतची मुदत होती. आता प्रवेशाला एक दिवसाची मुदतवाढ दिली आहे. या प्रवेश प्रक्रियेत आतापर्यंत एकूण २९ हजार ५५६ विद्यार्थ्यांनी प्रवेश घेतला आहे. यामध्ये कोट्यांतर्गत जवळपास पाच हजार ९५९ विद्यार्थ्यांनी प्रवेश घेतले आहेत. यात इन-हाऊस कोट्यातंर्गत तीन हजार ८४३, अल्पसंख्याक कोट्यातंर्गत एक हजार ७७१ आणि व्यवस्थापन कोट्यातंर्गत ३४५ विद्यार्थ्यांचा समावेश आहे.

तर पहिल्या फेरीतंर्गत निवड झालेल्या विद्यार्थ्यांपैकी साधारणत: ६० टक्के विद्यार्थ्यांनी (म्हणजेच २३ हजार ५७९) आतापर्यंत प्रवेश निश्चित केला आहे. पहिल्या नियमित फेरीतंर्गत प्रवेश प्रक्रिया पूर्ण झाल्यानंतर महाविद्यालयांमधील रिक्त जागांचा तपशील मागविण्यात येणार आहे. हा तपशील संकलित झाल्यानंतर दुसऱ्या नियमित फेरीचे वेळापत्रक जाहीर करण्यात येणार आहे.

इन्फोबॉक्स :

अकरावी प्रवेशाची आतापर्यंतची आकडेवारी :

कनिष्ठ महाविद्यालयांची संख्या : ३०८

प्रवेश क्षमता : १,१०, ७२५

एकूण झालेले प्रवेश : २९, ५५६

रिक्त जागा : ८१, १६९

पहिल्या फेरीतील प्रवेशाची आकडेवारी :

महाविद्यालये लॉट झालेले विद्यार्थ्यांची संख्या : ३८, ७९६

पहिल्या फेरीत झालेले प्रवेश : २३,५७९

महाविद्यालयांनी प्रवेश नाकारलेले विद्यार्थी : १०१

विद्यार्थ्यांनी रद्द केलेले प्रवेश : ६४४