पुणे : शिवाजीराव भोसले सहकारी बँकेच्या औंध, कोथरुड व वडगाव-शेरी या पुण्यातील तीन शाखांच्या तत्कालीन बँक मॅनेजरला शिक्रापूर पोलिसांनी आज अटक केली. प्रदीप निम्हण, नितीन बाठे व गोरख दोरगे अशी नावे आहेत.

पुणे जिल्हा परिषदेचे माजी बांधकाम सभापती तथा राष्ट्रवादीचे माजी प्रदेश उपाध्यक्ष मंगलदास बांदल यांच्यावर दाखल तीन गुन्ह्यांच्या तपासादरम्यान या तिघांनीही बेकायदेशीर मदत केल्याने ही कारवाई करण्यात आली. आपल्या अधिकाराचा दुरुपयोग करुन कर्ज मंजुरी केल्याचे तपासात निष्पन्न झाल्याने त्यांना अटक करण्यात आली असल्याची माहिती पोलिस निरीक्षक हेमंत शेडगे यांनी दिली.

26 मे रोजी शिक्रापूर पोलिस स्टेशनमध्ये बांदलांविरोधात पहिला गुन्हा दाखल झाला तो दत्तात्रय रावसाहेब मांढरे यांच्या तक्रारीवरुन. दूसरा दाखल झाला तो रवींद्र सातपूते यांच्या तक्रारीवरुन 30 मे रोजी तर 1 जुनला मंदार पवार यांच्या तक्रारीवरुन तिसरा गुन्हा दाखल झाला. यात अनुक्रमे वडगाव शेरी (पुणे) येथील शिवाजीराव भोसले सहकारी बॅंकेत (सन 2007 दरम्यान) तत्कालीन शाखाधिकारी म्हणून गोरख महादेव दोरगे, औंध शाखेत प्रदीप सहदेव निम्हण तर कोथरुड शाखेत नितीन मारुतराव बाठे आदी तिघेजण कार्यरत होते. याच काळात वरील तीनही प्रकरणात कर्जमंजुरी देताना अनियमितता झाल्याचे वरील तीनही प्रकरणातील तपासात निष्पन्न झाले. वरील तिघांनीही आपल्या अधिकाराचा दुरुपयोग केल्याचे स्पष्ट झाल्याने शिक्रापूर पोलिसांनी वरील तिघांनाही काल तपासकामी बोलावून त्यांना अटक केल्याचे शिक्रापूर पोलिसांच्या वतीने सांगण्यात आले.

दरम्यान वरीन तीनही गुन्ह्यांमध्ये बांदलांसह एकूण पाच जण सध्या न्यायालयीन कोठडीत असून वरील तीन बँक अधिकाऱ्यांना शिरुर येथील विशेष दंडाधिकाऱ्यांपुढे हजर करण्यात येणार आहे. वरील तीनही प्रकरणांचा तपास योग्य पध्दतीने सुरू असून पुढील कार्यवाही जिल्हा पोलिस अधिक्षक डॉ. अभिनव देशमुख व सर्व वरिष्ठ अधिकाऱ्यांच्या मार्गदर्शनाखाली सुरू असल्याचे शेडगे यांनी सांगितले.