पुणे - सावित्रीबाई फुले पुणे विद्यापीठाच्या (Pune University) द्वितीय सत्र परीक्षेसाठी केवळ बीएस्सीच्या अभ्यासक्रमात (Syllabus) ३० टक्के कपात (Reduction) केली आहे. मात्र, अनेक अभ्यासक्रम शिकवणे अद्याप अपूर्ण आहे. तसेच ऑनलाइन शिक्षण (Online Education) समजण्यात अनेक अडचणी आल्या आहेत. त्यामुळे सर्व अभ्यासक्रमांत ३० टक्के कपात करून ७० टक्के अभ्यासक्रमावर परीक्षा घ्यावी, अशी मागणी विद्यार्थ्यांकडून (Student) होत आहे. (30 Percent Reduction in Syllabus Demand of Students to the University)

‘सकाळ’ने विद्यापीठाच्या द्वितीय सत्र परीक्षेसाठी पूर्ण अभ्यासक्रम, हे वृत्त नुकतेच प्रसिद्ध केले. विद्यापीठाने या निर्णयाचा पुनर्विचार करण्याची मागणी विद्यार्थ्यांनी केली आहे. विद्यापीठाच्या द्वितीय सत्राच्या परीक्षा ऑनलाइन होणार आहे. विज्ञान शाखा वगळता इतर शाखांचा या परीक्षेसाठी १०० टक्के अभ्यासक्रम असणार आहे.

महाविद्यालये बंद असल्याने अनेक महाविद्यालयात अभ्यासक्रम शिकवून झालेला नाही. असे असताना पूर्ण अभ्यासक्रमावर परीक्षा घेण्याचा निर्णय कसा घेण्यात आला, असा सवाल उपस्थित करण्यात येत आहे. यामुळे सर्व शाखांच्या परीक्षा ७० टक्के अभ्यासक्रमावर घेण्याची मागणी विद्यापीठाचे प्र-कुलगुरू डॉ. एन. एस. उमराणी, अधिष्ठाता डॉ. मनोहर चासकर, डॉ. अंजली कुरने, डॉ. पराग काळकर, डॉ. संजीव सोनवणे यांच्याकडे केली असल्याचे महाराष्ट्र नवनिर्माण विद्यार्थी सेनेचे शहराध्यक्ष कल्पेश यादव यांनी सांगितले. एमएससी, इंजिनिअरिंग, एमबीए, यासह अनेक अभ्यासक्रमांच्या विद्यार्थ्यांनी सोशल मीडियावर अभ्यासक्रम कपात करावी, अशी मागणी केली आहे. युक्रांदचे उपाध्यक्ष कमलाकर शेटे म्हणाले, ‘‘अनेक महाविद्यालयांनी अभ्यासक्रम पूर्ण शिकवलेला नाही. जेवढा अभ्यासक्रम शिकवला आहे, त्यावर परीक्षा घेतली जावी’’