महुडे : महुडे (ता. भोर) हद्दीत आज महुडेहून भोरकडे जात असणाऱ्या एसटी बसचा (एमएच ०६ एस ८२८९) महुडे बुद्रुक येथील अंबाबाईच्या उतारावर साईडपट्टी सोडून बाजूच्या जागेत रुतल्याने अपघात (Bus Accident) झाला. बस चिखलात रुतल्याने मोठा अनर्थ टळला असला, तरी बस साईडपट्टीवरुन खाली उतरल्यावर बाजूच्या खड्ड्यात जोरदार आपटल्याने बसमधील प्रवासी जखमी झाले आहेत.

या अपघाताचे कारण समजले नाही. जखमीतील ३९ रुग्णांवर भोर उपजिल्हा रुग्णालयात (Bhor Hospital) तर, तीन रुग्णांवर खासगी दवाखान्यात उपचार सुरू आहेत. ४२ प्रवासी जखमी झाले असल्याची प्राथमिक माहिती आहे. या अपघातात सविता रघुनाथ पिलाणे, शिवराम देवबा पिलाणे, शिवन्या दामगुडे, द्रोपती किसन करंजकर, अंकुश पिलाणे, पूजा नवनाथ बांदल, रंजना विठ्ठल पिलाणे, मुक्ताबाई दामगुडे, पुष्पा दत्ताञय दामगुडे, अंकिता पिलाणे, छंबुबाई दामगुडे, सागर दामगुडे, हरिभाऊ दामगुडे, सुप्रिया शिंदे, बाजीराव शिंदे, निखिल पिलाणे, संगिता भगवान गोडांवळे, अंकुश दामगुडे, रमेश सिधू दामगुडे, भिकू खोपडे, द्रोपदा दामगुडे,

तसेच यशदाबाई पिलाणे, गोपाळ गोविंद दामगुडे, सोपान दामगुडे, नामदेव दामगुडे, पार्वती भालघरे, अनिता दामगुडे, यशवंत सोनबा दामगुडे, रंजना कोडींबा मोरे, प्रतीक्षा अनिल दामगुडे, आनुबाई हरिभाऊ दामगुडे, तुलशाबाई रामचंद्र पिलाणे, भागुबाई कृष्णा पवार, कमल गोपाल दामगुडे, वेदांत संजय शिंदे, सिंधुबाई चंद्रकांत दामगुडे, सरिता आनंदा दामगुडे, अनुबाई हरिभाऊ दामगुडे, भागुबाई कृष्णा पिलाणे, मोनिका पांडुरंग दामगुडे हे प्रवासी जखमी झाले आहेत. या एसटीला वाहक अजित प्रकाश आवाडे तर, चालक सोपान काशिनाथ तायडे होते.

सकाळची भोरहून दहा वाजता सुटलेली भोर-महुडे एसटी बस महुडेहून भोरकडे परतत असताना हा अपघात झाला. सोमवार असल्याने बस पूर्ण भरलेली होती. बसमधून ४२ हून अधिक प्रवासी प्रवास करीत होते. ४२ प्रवासी जखमी झाले असून तातडीने उपचारासाठी त्यांना भोरला पाठवण्यात आले. ३९ जणांवर भोर येथील उपजिल्हा रुग्णालयात उपचार करण्यात येत आहे. त्या ३९ जणांपैकी १४ जणांना ॲडमिट करुन घेतले असून इतरांवर प्राथमिक उपचार करण्यात आले असल्याचे उपजिल्हा रुग्णालयाचे वैद्यकीय अधीक्षक डॉ. आनंद साबणे यांनी सांगितले.

तर, तीन जण खासगी दवाखान्यात उपचार घेत आहेत. उपजिल्हा रुग्णालय परिसरात नातेवाइकांनी मोठी गर्दी केली आहे. भोर डेपोच्या बस खराब झाल्या असून जागोजागी बंद पडत असतात. बसमध्ये काही तरी बिघाड झाल्यामुळेच अपघात झाल्याचे बोलले जत आहे. भोर आगार व पोलिसांकडून अद्याप अपघाताबाबत सविस्तर माहिती मिळालेली नाही.