पुणे - शहरासह जिल्ह्यात गेल्या पाच महिन्यांत तब्बल चार कोटी ७२ लाख लिटर देशी-विदेशी दारूची विक्री झाली आहे. दारू पिणाऱ्यांच्या संख्येत आणि खपामध्ये वेगाने वाढ होत असल्याची माहिती राज्य उत्पादन शुल्क विभागाच्या आकडेवारीवरून समोर आली आहे. 

‘पीनेवालों को पीने का बहाना चाहिए’, असं म्हटलं जातं. कधी दु:खात, आनंदात पार्टी म्हणून, कधी काही कारण नसताना, तर व्यसन जडल्यामुळे दारू पिणाऱ्यांचे प्रमाण हे वाढतच आहे. राज्यात महिलांकडून दारूबंदीची मागणी केली जाते; परंतु दारू विक्रीतून जास्त महसूल मिळत असल्यामुळे त्या मागणीकडे फारशा गांभिर्याने पाहिले जात नाही. सर्वोच्च न्यायालयाच्या आदेशानुसार गतवर्षी महामार्गालगत पाचशे मीटर अंतरापर्यंतचे परमीट रूम आणि बिअर बार बंद झाले होते; परंतु सुधारित निर्णयानंतर ते पुन्हा सुरू झाले. जिल्ह्यात गेल्या एप्रिल ते ऑगस्ट या पाच महिन्यांत देशी, विदेशी दारू आणि बिअर अशी एकूण चार कोटी ७२ लाख लिटर दारू मद्यप्रेमींनी रिचवली. या तुलनेत वाईन पिणाऱ्यांची संख्या तुलनेत कमी आहे; तरी जिल्ह्यात दर महिन्याला एक ते सव्वालाख लिटर वाईनची विक्री होते.

जिल्ह्यात अवैध दारू विक्रेत्यांवरील कारवायांचे प्रमाण वाढले आहे. तसेच, दरवर्षी मद्य पिणाऱ्यांच्या संख्येतही वाढ होत आहे. त्यामुळे मद्य विक्रीत वाढ झाली आहे. यामुळे महसुलातही वाढ झाली आहे.
- डॉ. बी. एच. तडवी, अधीक्षक, राज्य उत्पादन शुल्क, पुणे जिल्हा