पुणे - आरोग्य विभागाच्या (Health Department) वतीने राबविण्यात येणाऱ्या शहरी-गरीब योजनेतील (Urban Poor Scheme) लाभार्थ्यांची (Beneficiaries) पडताळणी महापालिका प्रशासनाने (Municipal Administrative) सुरू केली आहे. त्यामध्ये गेल्या वर्षाच्या लाभार्थ्यांच्या यादीत ६३२ जणांच्या नावाने मिळकती असल्याची माहिती पुढे आली आहे. (632 Property Owners in Urban Poor Scheme)

शहरातील आर्थिक दुर्बल घटकांना वैद्यकीय उपचारासाठी शहरी-गरीब योजनेतंर्गत महापालिकेकडून आर्थिक मदत केली जाते. त्याचप्रमाणे राज्य सरकारच्या महात्मा फुले जन आरोग्य योजना आणि पंतप्रधान आयुष्यमान भारत योजनेअतंर्गतही वैद्यकीय उपचारासाठी साहाय्य दिले जाते. यासर्व योजनांचा एकत्रित आढावा घेत असल्याचे अतिरिक्त आयुक्त रुबल अग्रवाल यांनी सांगितले.

अग्रवाल म्हणाल्या, ‘गेल्या वर्षी शहरी-गरीब योजनेचा सुमारे १२ हजार नागरिकांनी लाभ घेतला. या लाभार्थ्यांची आर्थिक परिस्थिती खरच हलाखीची आहे का, त्यांच्या नावावर मिळकती आहेत का, याचा शोध घेतला. एकूण लाभार्थ्यांपैकी ६३२ जणांच्या नावाने मिळकती असल्याचे आढळून आले आहे. त्यांना नोटिसा बजाविणार आहेत.’

राज्य सरकारची महात्मा फुले जन आरोग्य योजना आणि केंद्र सरकारची पंतप्रधान आयुष्यमान भारत योजनेसंदर्भात बैठकीत चर्चा झाली. यामध्ये आयुष्यमान भारत योजनेचे केवळ सव्वालाख कार्डधारक असून, त्यांची संख्या वाढविण्याचे आदेश क्षेत्रीय कार्यालयांना दिले असल्याचे त्या म्हणाल्या.