न्हावरे (पुणे) : लग्न समारंभात सहभागी झालेल्या नागरगाव (ता. शिरूर) येथील एका ७० वर्षीय महिलेचा कोरोना अहवाल पॉझिटिव्ह आला, अशी माहिती निमोणे आरोग्य केंद्राच्या आरोग्य अधिकारी डॉ. इंदिरा डॅनियल यांनी दिली. त्यामुळे शिरूरच्या पूर्व भागात पुन्हा एकदा कोरोनाचा शिरकाव झाला आहे. 

ताज्या बातम्यांसाठी डाऊनलोड करा ई-सकाळचे ऍप   

शिरूरच्या पूर्व भागात न्हावरे येथे प्रथम दोन रुग्ण आढळले. त्यानंतर अनुक्रमे मांडवगण फराटा येथे एक, कोकडेवाडीत एक, बाभुळसर येथे एक, तर कुरूळी येथे दोन रुग्ण आढळले होते. आता सातही रुग्ण ठणठणीत होऊन शिरूरचा पूर्व भाग कोरोनामुक्त झाला होता. मात्र, आता नागरगाव येथे रुग्ण आढळल्याने कोरोनाने पुन्हा पुर्व भागात शिरकाव केला आहे. ७० वर्षीय महिला वीस दिवसांपूर्वी नातेवाइकाच्या लग्नाला गेली होती. लग्नाहून परत आल्यानंतर सात दिवसापांसून त्यांना सर्दी, खोकला, ताप असा त्रास होऊ लागला होता. त्यामुळे त्यांची विश्वराज हॉस्पिटल येथे कोरोना चाचणी केली. तेव्हा तपासणीचा अहवाल  पॉझिटिव्ह आला आहे.

पुण्याच्या बातम्या वाचण्यासाठी येथे ► क्लिक करा

या बाबत माहिती देताना निमोणे आरोग्य केंद्राच्या आरोग्य अधिकारी डॉ. डॅनियल म्हणाल्या, की कोरोनाबाधित रुग्णांच्या संपर्कात किती व्यक्ती आल्या आहेत. याचा शोध सुरू असून, त्यांना क्वारंटाइन केले जाईल. त्याचबरोबर कंन्टेमेंट झोन निश्चित करून त्या परिसरात औषध फवारणी केली जाईल. नागरिकांनी मास्क व सॅनिटायझरचा वापर करावा. ग्रामपंचायत प्रशासन कोरोनाची साखळी तोडण्यासाठी सक्रिय झाले असून, नागरिकांनी कोरोनाचा फैलाव होऊ नये म्हणून सुरक्षित खबरदारी घेण्याचे आवाहन प्रशासनाच्या वतीने करण्यात आले आहे. त्याचबरोबर नागरिकांनी विनाकारण घराबाहेर पडू नये. प्रशासनाला सहकार्य करावे, असे आवाहन सरपंच मनिषा शेलार यांनी केले.

Edited by : Shivnandan Baviskar