पुणे - भेसळीच्या संशयावरून नऊ लाख ३७ हजार रुपये किमतीचा तुपाचा साठा जप्त केला. याचे नमुने तपासण्यासाठी राज्य आरोग्य प्रयोगशाळेत पाठविण्यात आले असून, त्याच्या अहवालावर पुढील कार्यवाही करण्यात येईल, असे अन्न व औषध प्रशासनातर्फे (एफडीए) सांगण्यात आले.

लेबल नसलेल्या तुपाच्या डब्याची वाहतूक करणारा टेंपो भारती विद्यापीठ पोलिसांनी पकडला. त्यांनी त्याची माहिती ‘एफडीए’च्या कार्यालयाला दिली. ही माहिती मिळताच अन्न सुरक्षा अधिकारी क्रांती बारवकर घटनास्थळावर गेल्या. त्यांनी तुपाचे शंभर डबे जप्त केले. त्याचे वजन सुमारे दीड हजार किलो आहे. त्याची बाजारातील किंमत चार लाख ४९ हजार ७०० रुपये आहे. तुपाचा हा साठा भेसळयुक्त व कमी दर्जाचा असल्याच्या संशयावरून तो जप्त करून त्याचे नमुने घेण्यात आले. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

हे तूप शिवण्यातील धावडे इंडस्ट्रियल इस्टेटमधील डी. जी. एम. इंडस्ट्रीज येथून खरेदी केल्याची माहिती पुढे आली आहे. अन्न सुरक्षा अधिकाऱ्यांच्या पथकाने तेथे छापा टाकला. तेथील एक हजार २३ किलो वजनाचे चार लाख ८७ हजार ५९० रुपये किमतीचे तूप जप्त केले. अस्वच्छ वातावरणात हे तूप तयार केले जात होते. त्यामुळे त्याचे नमुने घेण्यात आले. या दोन्ही ठिकाणी मिळून दोन हजार ५२२ किलो तूप जप्त केले.

मोबाईलमध्ये आता 'स्वदेशी बॅटरी'; देशातील पहिली लिथियम आयन बॅटरी पुण्यात विकसित 

अन्न सुरक्षा अधिकारी गणपत कोकणे, राजेंद्र काकडे, अर्चना झांजुर्णे, अन्वेषक राजेश आल्हाट यांनी पुणे विभागाचे सहआयुक्त शिवाजी देसाई, सहायक आयुक्त बा. म. ठाकूर आणि सी. ए. देसाई यांच्या मार्गदर्शनाखाली ही कारवाई केली.

पुणे परिसरात गारठा वाढणार; हवामान तज्ज्ञांचा अंदाज

अन्न सुरक्षा व मानदे कायद्याची गेल्या नऊ वर्षांपासून राज्यात अंमलबजावणी सुरू आहे. प्रत्येक नागरिकाला सुरक्षित, सकल आणि निर्भेळ अन्नपदार्थ पुरवठा करणे हा या कायद्याचा उद्देश आहे. 
- शिवाजी देसाई, सहआयुक्त, ‘एफडीए’, पुणे विभाग

Edited By - Prashant Patil