पुणे : पुण्यासह (pune) राज्यातील पाच महापालिका क्षेत्रांमध्ये अकरावी (FYJC) ऑनलाइन प्रवेशासाठी नोंदणीची प्रक्रिया शनिवारपासून सुरू झाली. राज्यात पहिल्या दिवशी ९४ हजार ४४७ विद्यार्थ्यांनी अर्ज नोंदणी केली. तसेच पुण्यातील १८ हजार ५६५ विद्यार्थ्यांनी नोंदणी केली आहे.

या प्रवेश प्रक्रियेचे उद्‌घाटन शालेय शिक्षणमंत्री वर्षा गायकवाड (varsha gaikwad) यांच्या उपस्थितीत ऑनलाइन झाले. पुणे आणि पिंपरी-चिंचवडसह मुंबई, नाशिक, अमरावती, नागपूर या महापालिकेच्या ही प्रवेश प्रक्रिया राबविण्यात येते. प्रक्रियेतंर्गत ऑनलाइन अर्ज नोंदणी करणे, अर्ज भरणे, अर्जाचा भाग एक भरणे, अर्ज संबंधित शाळा किंवा मार्गदर्शन केंद्रातून तपासून घेणे, अर्ज सबमिट करणे यासाठी २२ ऑगस्टपर्यंत मुदत देण्यात आली आहे.

प्रवेश प्रक्रियेदरम्यान ऑनलाइन अर्ज नोंदणीस सुरुवातीला संकेतस्थळावर तांत्रिक अडचणी येत असल्याचे विद्यार्थी, पालकांचे म्हणणे आहे. मात्र, अर्ज भरताना इंटरनेट सेवा विस्कळित होण्यासारखे प्रकार विद्यार्थ्यांच्या वैयक्तिक स्तरावर झाले असतील. संकेतस्थळ सुरळीत सुरू असून त्यात कोणतीही तांत्रिक अडचणी आली नसल्याचे माध्यमिक व उच्च माध्यमिक शिक्षण संचालनालयाचे संचालक दत्तात्रय जगताप यांनी सांगितले.