पुणे : शिक्षण हक्क कायद्यामधील (आरटीई) शाळा प्रवेशाच्या बदलांविरोधात आम आदमी पार्टी आणि पालक संघटनांनी पुण्यातील बालगंधर्व रंगमंदिर चौकात आंदोलन केले. नव्या बदलांमुळे एक किलोमीटर परिसरात शासकीय किंवा अनुदानित शाळा असल्यास संबंधित परिसरातील विना अनुदानित शाळेत आरटीईअंतर्गत २५ टक्के राखीव जागांवर प्रवेश दिला जाणार नाही.

या निर्णयाला सर्व स्तरांतून विरोध केला जात आहे. हा आदेश मागे घ्यावा, या मागणीसाठी आंदोलन केल्याचे प्रसिद्धी पत्रकात म्हटले आहे. नव्या बदलांमुळे गरीब मुलांना कुठल्याही खासगी इंग्रजी शाळांमध्ये प्रवेश मिळण्याची शक्यता आता पूर्णपणे दुरावली आहे.

या बदलांमुळे वंचित आणि दुर्बल घटकांतील मुले यांच्यासाठी सरकारी शाळा आणि श्रीमंतांसाठी खासगी इंग्रजी शाळा अशी विभागणी होणार आहे. या पद्धतीमुळे शिक्षणातील सामाजिकीकरणाच्या उद्देशाला हरताळ फासला जाईल, असा आरोप ‘आप’कडून केला. आर्थिक, सामाजिक स्तरांमुळे येणाऱ्या अडचणी दूर करत खासगी शाळांमध्ये वंचित दुर्बल घटकांसाठी २५ टक्के राखीव जागा ठेवणे हेच न्यायपूर्ण आहे.

त्यामुळे सरकारने केलेली दुरुस्ती ही न्यायालयाच्या निर्णयाचा अवमान करणारी आहे, असा आरोप ‘आप’चे प्रवक्ते मुकुंद किर्दत यांनी केला. यावेळी शहराध्यक्ष सुदर्शन जगदाळे, पालक आघाडीच्या ललिता गायकवाड आदी उपस्थित होते. सरकारने हा बदल करणारा आदेश मागे घ्यावा, अन्यथा अधिक तीव्र आंदोलन पालक करतील, असा इशारा दिला.