इंदापूर : पुणे सोलापूर राष्ट्रीय महामार्गावर लोणी देवकर ( ता. इंदापूर) गावचे हद्दीत महामार्गावरून यावली (ता. मोहोळ) कडे निघालेल्या दुचाकीस पाठीमागून आलेल्या दोस्त टेम्पोने जोरदार धडक दिल्याने मनोज कांचन ( वय ३१, रा. उरुळी कांचन ता. हवेली ) या दुचाकीस्वार युवकाचा अपघाती मृत्यू झाला. हा अपघात दि. १२ मे रोजी झाला असून याबाबत मयत युवकाचा मावस भाऊ राहुल शंकर मेमाणे ( वय ५२, रा.कोरेगाव मुळ, इनामदार वस्ती, ता.हवेली, जि.पुणे ) यांनी टेम्पो चालक अनिल कविराज राऊत ( रा.जळकोट,जि.लातूर )यांच्या विरूद्ध इंदापूर पोलीस ठाण्यात फिर्याद दिली आहे.

मनोज कांचन हे दुचाकी वरून सोलापूर दिशेने जात असताना पाठीमागून आलेल्या भरधाव टेंपोने (क्र. एम.ऊच.१४,जीडी ८५१४ ) त्यांच्या दुचाकीस धडक दिल्याने मनोज कांचन यांचा मृत्यू झाला. मात्र त्यानंतर टेम्पोपाठीमागून आलेल्या तसेच सोलापूर दिशेने जाणाऱ्या लक्झरी बस ( क्र.एम.एच.११,सी.एच.६६७६ )खाली दुचाकी अडकून रस्त्याने फरफटत गेल्याने घर्षण होवून दुचाकी व लक्झरी बसने पेट घेतला.त्यात दोन्ही वाहने जागेवर जळून खाक झाली.सुदैवाने लक्झरीने पेट घेतल्यानंतर गाडीचालकाने प्रसंग वधान राखून बस रस्त्याच्या कडेला नेवून सर्व प्रवाशांना गाडीतून सुखरूप खाली उतरवल्याने जीवितहानी झाली नाही मात्र प्रवाशांचे सामान, साहित्य जळून खाक झाल्याने वित्तहानी झाली. पुढील तपास इंदापूर पोलीस करत आहेत.