पुणे - कोरोना संशयित किंवा बाधित रुग्णांना टाळणाऱ्या धर्मादाय रुग्णालयांवर कारवाई करण्यात येईल. असे प्रकार घडू नयेत यासाठी २४ तास सामाजिक कार्यकर्त्यांची (सोशल वर्कर) नेमणूक करण्यात येणार असून, त्यांचे मोबाईल क्रमांक उपलब्ध करून देण्यात येतील, अशी माहिती धर्मादाय आयुक्त दिलीप देशमुख यांनी दिली. 

- ताज्या बातम्यांसाठी डाऊनलोड करा ई-सकाळचे ऍप 

कोरोना बाधित किंवा इतर कोणत्याही आजाराने पीडित रुग्णांवर खासगी धर्मादाय रुग्णालयांमध्ये मोफत उपचार करण्यात येतील. परंतु संबंधित व्यक्तीच्या कुटुंबाचे वार्षिक उत्पन्न ८५ हजार रुपयांच्या आत असणे आवश्यक आहे. 

केईएम रुग्णालयामध्ये एका रुग्णाला आयसोलेशन वॉर्ड उपलब्ध करून न दिल्याची तक्रार समर्थ पोलिस ठाण्यात प्राप्त झाली आहे. या संदर्भात धर्मादाय सहआयुक्त दिलीप देशमुख म्हणाले, याबाबत कार्यालयास अद्याप तक्रार प्राप्त झालेली नाही. तक्रार प्राप्त झाल्यास त्याची पडताळणी करून योग्य कारवाई करण्यात येईल. 

पुण्याच्या इतर बातम्या वाचण्यासाठी येथे - क्लिक करा

ज्यादा शुल्क आकारल्यास खबरदार... 
रुग्णांकडून जादा शुल्क आकारण्यात येत असल्यास संबंधित व्यक्तीने धर्मादाय सहआयुक्त कार्यालयात तक्रार अर्ज द्यावा. अवास्तव किंवा जादा शुल्क आकारणाऱ्या रुग्णालयांवर कारवाई करण्यात येईल. या संदर्भात दर महिन्याला शेवटच्या शनिवारी संबंधित समितीची धर्मादाय सहआयुक्त कार्यालयात सुनावणी घेण्यात येते. यादरम्यान एखाद्या रुग्णालयाने ज्यादा शुल्क वसूल केल्याचे आढळून आल्यास रुग्ण व्यक्तीला ती रक्कम परत देण्याचा निर्णय घेण्यात येतो. 

ससून रुग्णालयाला दोन कोटी : 
कोरोनाबाधित रुग्णांवर उपचार आणि वैद्यकीय साहित्य उपलब्ध करून देण्यासाठी ससून रुग्णालयास देवस्थान ट्रस्टच्या माध्यमातून दोन कोटी रुपये उपलब्ध करून देण्यात आले. परप्रांतीय आणि गरीब मजुरांसाठी धर्मादाय संस्थांच्या मदतीने अन्नधान्य उपलब्ध करून दिले. तसेच, रस्त्यावर उतरून नागरिकांची सेवा करणाऱ्या पोलिस आणि महापालिका कर्मचाऱ्यांची प्रतिकारशक्ती वाढवण्यासाठी होमिओपॅथी औषधे उपलब्ध करून दिली आहेत, असे धर्मादाय सहआयुक्त दिलीप देशमुख यांनी सांगितले.