मार्केट यार्ड (Pune): शहरातील कोरोनाच्या वाढत्या पार्श्वभूमीवर समितीने मार्केट यार्डातील गर्दी कमी करण्यासाठी विविध उपाययोजना आखल्या आहेत. परंतु भुसार बाजारातील काही किराणा दुकानदारांकडून या उपाययोजनांना खो घातला होता. कोरोना नियमांचे उल्लंघन केल्यामुळे बाजार समिती प्रशासनाने भुसार विभागातील ६ व्यापाऱ्यांवर प्रत्येकी ५९०० रुपये दंड करत ३५४०० रुपयांची दंडात्मक कारवाई केली.

कोरोनाच्या पार्श्वभूमीवर प्रशासनाने नियम घालून दिले आहेत. मात्र किराणा दुकानदारांकडून सर्व प्रकारचे नियम पायदळी तुडवले जात आहेत. दुकानात मोठ्या प्रमाणावर गर्दी होत आहे. त्यामुळे बालाजी ट्रेडर्स भु. क्र. 580,581, न्यु बालाजी ट्रेडिंग कं. 582, ओसिया ट्रेडिंग कं. 513, 514, बजरंग ट्रेडिंग कं. 515, सिंघल ट्रेडिंग कं. 519 तसेच बालाजी ट्रेडिंग कं. 512/3 या दुकानांवर कारवाई केली आहे. पुणे कृषी उत्पन्न बाजार समितीचे प्रशासक मधुकांत गरड यांच्या मार्गदर्शनानुसार भुसार विभाग प्रमुख नितीन रासकर, प्रशांत गोते, अजित चंद यांनी ही दंडात्मक कारवाई केली.

कोरोना विषाणूंचा प्रादुर्भाव दिवसेंदिवस वाढत असल्याने लॉकडाऊन लागू करण्यात आले. तसेच नागरिकांची अत्यावश्यक गोष्टींची गैरसोय होऊ नये म्हणून किराणा दुकाने सुरू ठेवण्याचा निर्णय घेण्यात आला. ही दुकाने सुरू ठेवताना काही नियम ही घालण्यात आले आहेत. मात्र या दुकानदारांकडून या नियमांना केराची टोपली दाखविली जाात आहे. बाजारात किराणा दुकानात सोशल डिस्टंन्सिंगचा फज्जा उडत आहे. तसेच दुकानातील अनेक कामगारांच्या तोंडाला मास्क दिसत नाही. वेळेची मर्यादा घालून दिली असतानाही ती पाळली जात नाही. तसेच गर्दीमुळे या इथे वाहतूक कोंडी देखील होत आहे. तसेच या दुकानात होत असलेल्या गर्दी आणि वाहतूकोंडीमुळे आजूबाजूच्या घाऊक व्यापाऱ्यांना याचा त्रास होत असल्याचे काही व्यापाऱ्यांनी सांगितले.

बाजारात नियम मोडणाऱ्यांवर दंडात्मक कारवाई केली जात आहे. परंतु परत परत नियम मोडताना आढळून आल्यास त्यांच्यावर परवाना निलंबनाची कारवाई करण्यात येणार आहे. त्यामुळे सर्वांनी नियम पाळून समितीला सहकार्य करावे.

- मधुकांत गरड, प्रशासक, कृषी उत्पन्न बाजार समिती, पुणे