बारामती : उजनी जलाशयामध्ये बोटिंग किंवा नौकाविहाराची परवानगी नसतानाही अनेक वर्षांपासून बेकायदा बोट चालविल्या जातात, ही बाब माहिती असूनही त्या विरुध्द कारवाई न केल्याबद्दल उजनी धरण (Ujani Dam) प्रशासनासह महसूल विभागाच्या अधिका-यांवर कारवाईची मागणी ग्राहक संरक्षण परिषदेचे सदस्य अॅड. तुषार झेंडे पाटील यांनी राज्याच्या मुख्य सचिवांकडे केली आहे.

भंगारातून खरेदी केलेल्या बोटींचा (Boating) होणारा वापर, सुरक्षिततेसाठी लाईफ जॅकेट नसणे यासह परवानगी नसताना बोटिंग किंवा नौकाविहार करणे या बाबत बेकायदा आहेत. या बाबी होत असल्याची माहिती असूनही उजनी धरण प्रशासन व महसूल विभागाने या रोखण्यासाठी काहीही केलेले नाही.

सन 2017 मध्येही बोट उलटून सहा डॉक्टरांचा दुर्देवी अंत झालेला होता. त्या नंतरही प्रशासनाला जाग आली नाही. प्रशासनाच्या दुर्लक्षामुळे पुन्हा एकदा सहा जणांचा जीव गेल्याने या बाबत कारवाई व्हावी व मृतांच्या नातेवाईकांना मुख्यमंत्री सहायता निधीतून (CM Relief Fund) प्रत्येकी पाच लाखांची मदत व्हावी, अशी मागणी अॅड. झेंडे यांनी केली आहे.