पुणे : कचरा डेपोप्रकरणी फुरसुंगीतील रहिवाशांनी आक्रमक भूमिका घेतल्याने येत्या बुधवारपासून पुणेकरांची पुन्हा एकदा 'कचराकोंडी' होण्याची शक्यता आहे. 'फुरसुंगी डेपोमध्ये केवळ प्रक्रिया केलेला कचराच येऊ दिला जाईल', असा इशारा येथील नागरिकांनी प्रशासनाला दिला आहे.

गेल्या अनेक वर्षांपासून फुरसुंगी येथील कचरा डेपोचा प्रश्न प्रलंबित आहे. 'कचरा उघड्यावर टाकला जाऊ नये' या नागरी घनकचरा अधिनियम २००० नुसार न्यायालयाच्या आदेशाची आणि आराखड्याची अंमलबजावणी पुणे महापालिकेने करावी, अशी फुरसुंगीतील रहिवाशांची मागणी आहे.

याच आंदोलनातील भाग म्हणून १ ऑगस्टपासून सकाळी नऊपासून कचर्‍याच्या गाड्या अडविण्याच्या निर्णयावर फुरसुंगीचे ग्रामस्थ ठाम आहेत. यामुळे पुणेकरांना कचराकोंडीला सामोरे जावे लागण्याची दाट शक्यता आहे.

त्यामुळे पुणे महापालिका यावर काय पावले उचलते, याकडे लक्ष आहे.