मंचर, ता. २३ : ‘‘कृषी पायाभूत सुविधा निधी योजनेअंतर्गत पात्र लाभार्थ्यांना सवलतीच्या कर्जाचा लाभ मिळवून देण्यासाठी राज्यभर विशेष अंमलबजावणी मोहीम राबविण्यात येत आहे. शेतकरी, शेतकरी उत्पादक कंपन्या
, सहकारी संस्था, बचत गट आणि कृषी उद्योजकांनी तालुका कृषी अधिकारी, आत्मा कार्यालय, कृषी विभाग किंवा जवळच्या राष्ट्रीयीकृत बँकेशी संपर्क साधून योजनेचा लाभ घ्यावा,’’ असे आवाहन घोडेगाव येथील तालुका कृषी कार्यालयातील सहाय्यक तंत्रज्ञान व्यवस्थापक धोंडीभाऊ पाबळे यांनी केले आहे.
केंद्र सरकारच्या कृषी व शेतकरी कल्याण मंत्रालयामार्फत ही मोहीम राबविण्यात येत असून, शेतमालाच्या काढणीनंतर साठवणूक, प्रक्रिया, वाहतूक आणि विपणनासाठी आवश्यक आधुनिक पायाभूत सुविधा उभारण्यास प्रोत्साहन देणे हा योजनेचा उद्देश आहे.

दोन कोटी रुपयांपर्यंतचे कर्ज
कृषी पायाभूत सुविधा निधी योजनेअंतर्गत पात्र लाभार्थ्यांना दोन कोटी रुपयांपर्यंतच्या कर्जावर तीन टक्के व्याज सवलत तसेच पतहमी (क्रेडिट गॅरंटी) सुविधा उपलब्ध करून दिली जाते. त्यामुळे कृषी क्षेत्रातील उद्योजकांना कमी व्याजदरात प्रकल्प उभारणीची संधी मिळत आहे.

यासाठी आर्थिक सहाय्य
गोदामे, शीतगृहे, पॅकगृहे,
प्रतवारी व वर्गीकरण केंद्रे
प्राथमिक प्रक्रिया केंद्रे
कृषी वाहतूक सुविधा
जैविक निविष्ठा निर्मिती केंद्रे