बारामती - ज्यांना माझे काम बघवत नाही, मी जे करतो त्या बद्दल ज्यांच्या मनामध्ये चुकीच काहीतरी असत, आमच्यावर अतिशय प्रेम करणारी जी लोक आहेत, तेच माझ्याबाबत संभ्रमाचे वातावरण तयार करतात, अशी टीका विरोधी पक्षनेते अजित पवार यांनी केली.

बारामतीत आज माध्यमांशी बोलताना अजित पवार म्हणाले, शरद पवार यांच्या पत्रकार परिषदेला मी हजर नव्हतो कारण शरद पवार साहेबांनीच प्रफुल्ल पटेल, जयंत पाटील व इतर काही मान्यवरांना पत्रकार परिषदेला यावे असे सांगितले होते,

पत्रकार परिषदेत खुर्च्याही मर्यादीत असतात, त्या मुळे साहेबांच्या सूचनेनुसारच आम्ही आमच्या कामाला गेलेलो होतो, त्या बाबतही विनाकारण बातम्या चालविल्या गेल्या. साहेबांनी जो आदेश दिला होता त्या नुसारच ठराविक लोक पत्रकार परिषदेला हजर राहिले, बाकीचे हजर राहिले नाही.

मुख्यमंत्री कर्नाटकात प्रचाराला गेल्याचे विचारले असता, ते कुठ गेले काय करतात या वॉचवर मी अजिबात नाही, मला त्याच्याशी काहीही देणघेण नाही, माझी कामे सुरु आहेत.

राज ठाकरे यांनी केलेल्या मिमिक्रीबद्दल विचारता अजित पवार म्हणाले, राज ठाकरे यांना मिमिक्रीशिवाय दुसर काय जमत, मिमिक्री करण हा त्यांचा जन्मसिध्द हक्क आहे, असे अजित पवार यांनी हसत हसत नमूद केले,

त्यांना जनतेने नाकारलेले आहे, स्वताःचा पक्ष वाढविण्याऐवजी अजित पवार यांच्यावर मिमिक्री करण व त्यांच व्यंगचित्र काढण यात त्यांना समाधान वाटत असेल आणि त्यातून त्यांना समाधान मिळत असेल तर त्यांना माझ्या शुभेच्छा आहेत.

दरम्यान शरद पवार यांनी जी भूमिका मांडली तीच पक्षाची अंतिम भूमिका आहे, पवारसाहेबांच्या भूमिकेवर मी काहीही मत व्यक्त करणार नाही, असेही अजित पवार म्हणाले. त्यांच्या राजीनाम्याचा विषय आता संपलेला असून सर्वच जण आपापल्या कामाला लागलेले आहेत, त्या मुळे हा विषय काढून माझाही वेळ घेऊ नका व तुमचाही वेळ वाया घालवू नका, असा सल्लाच अजित पवारांनी माध्यमांना दिला.