अक्कलकोटच्या स्वामी समर्थांचे मंदिर
खग्रास चंद्रग्रहण दिवशी दोन तास बंद

सकाळ वृत्तसेवा
अक्कलकोट, ता. २७ : फाल्गुन शुक्ल पक्ष पौर्णिमा मंगळवार (ता. ३) रोजी रोजी खग्रास (ग्रस्तोदीत) चंद्रग्रहण आहे. खग्रास ग्रहणाचे स्पर्श सायं. ६ वाजून ३१ मिनिटांनी तर मोक्ष सायं. ६ वाजून ४८ मिनिटांनी असल्याने सायंकाळी ६ ते रात्री ८ या वेळेत २ तास अक्‍कलकोट येथील स्वामी समर्थ मंदिर बंद राहील, यानंतर पुन्हा नेहमीप्रमाणे दर्शनाकरिता मंदिर उघडण्यात येईल. यानंतर मंदिरात रात्री ७:४५ ते ८:४० यावेळेत नित्यनियमाने होणारी महाराजांची शेजारतीही होणार नाही, अशी माहिती पुरोहित मंदार महाराज पुजारी यांनी दिली.

तसेच भक्तांच्या वतीने सकाळी नित्यनियमाने होणारे अभिषेक व सकाळी ११.३० ची महाराजांची नैवेद्य आरती होणार नाही, परंतु, ग्रहणपर्व काळात दिवसभर ते सायंकाळी ६ पर्यंत स्वामी दर्शन चालू राहील. देवस्थानच्या नित्यक्रमात व स्वामींच्या दिनक्रमात बदल करण्यात आले आहेत.
अक्कलकोट शहर व परिसरात या खग्रास ग्रस्तोदीत चंद्रग्रहणाचे स्पर्श सुर्यास्ताच्यावेळी सायं ६ वाजून ३१ मिनिटांनी तर मोक्ष सायंकाळी ६ वाजून ४८ मिनिटाला होईल. एकूण १८ मिनीटे खग्रास ग्रस्तोदीत चंद्रग्रहणाचा मुख्य पर्वकाळ राहील. बुधवारी (ता.४) रोजी रोजी पहाटे काकडा-आरती व भाविकांचे नित्यनियमाने होणारे अभिषेक या धार्मिक विधींना नेहमीप्रमाणे सुरवात होईल. याची सर्व स्वामी भक्तांनी नोंद घ्यावी, अशी माहिती मंदिर समितीचे चेअरमन महेश इंगळे यांनी दिली.