ग्राहक सेवा, हानी कमी
करून वीजबिल वसुलीवर भर

शंभर टक्के वीजबिल वसुलीचे संचालक धनंजय औंढेकर यांचे निर्देश

अॅग्रोवन वृत्तसेवा
अकोला ः वीज ग्राहकांना सुरळीत सेवा देणे, वितरण व वाणिज्यिक हानी कमी करणे तसेच वितरित केलेल्या वीजबिलांची शंभर टक्के वसुली करणे, या त्रिसूत्रीवर काम करण्याचे निर्देश संचालक (संचालन) धनंजय औंढेकर यांनी दिले.
अकोला येथील विद्युत भवनात अकोला परिमंडळाच्या आढावा बैठकीत ते बोलत होते. यावेळी मुख्य अभियंता दत्तात्रय बनसोडे, अधीक्षक अभियंते राजेश घाटोळे, धनंजय अहेर, संदीप दरवडे, दीपक सोनोने यांच्यासह विभागीय कार्यकारी अभियंते व अन्य अधिकारी उपस्थित होते.
वारंवार वीजपुरवठा खंडित होण्याची कारणे शोधून त्यावर तातडीने उपाययोजना कराव्यात, असे औंढेकर यांनी सांगितले. फिडर सेपरेशनची उर्वरित कामे गतीने पूर्ण करून कृषी ग्राहकांना दिवसा वीजपुरवठा करण्याच्या सूचनाही त्यांनी दिल्या. ग्राहकांना अचूक वीजबिले मिळावीत यासाठी फॉल्टी अथवा रिडिंग न होणारे मीटर तातडीने बदलून स्मार्ट मीटर बसवावेत. प्रलंबित वीजजोडण्या त्वरित देऊन कामातील निष्काळजीपणा टाळावा, असे त्यांनी स्पष्ट केले.
वितरण व वाणिज्यिक हानी कमी करण्यासाठी वीजबिलांची शंभर टक्के वसुली करण्यावर भर द्यावा. थकबाकीदारांवर नियमानुसार कारवाई करून वीजचोरीविरोधी मोहीम अधिक तीव्र करण्याचे निर्देशही औंढेकर यांनी दिले.

अकोला ः येथील विद्युत भवनात आढावा घेताना संचालक (संचालन) धनंजय औंढेकर. शेजारी मुख्य अभियंता दत्तात्रय बनसोडे.