आळंदी - तीर्थक्षेत्र विकास आराखड्यातून आळंदीत इंद्रायणी नदीवर वाहतुकीसाठी पूल बांधण्यात आला. मात्र, पुलाच्या बांधकामाचा राडारोडा ठेकेदाराने तसाच सोडल्याने नदीपात्राचे विद्रूपीकरण झाले आहे. मात्र, संबंधित ठेकेदारावर कारवाई होत नसल्याने प्रशासनावर नाराजी व्यक्त होत आहे. 

ताज्या बातम्यांसाठी डाऊनलोड करा ई-सकाळचे ऍप

वाहतुकीस विविध ठिकाणी पर्यायी मार्ग म्हणून आळंदी शहरात इंद्रायणी नदीवर कोट्यवधी रुपये खर्चून पूल बांधले. या पुलाच्या कामाचे बिलही संबंधित ठेकेदारास देण्यात आले आहे. मात्र, वर्षभरात ठेकेदाराने नदीपात्रातील राडारोडा अद्याप उचललेला नाही.

साधकाश्रमासमोरील पूल आणि भक्त पुंडलिक मंदिरालगतच्या पुलाजवळ स्काय वॉकचे काम सुरू आहे. ठिकठिकाणी ठेकेदाराने नदीपात्रातच राडारोडा टाकल्याने पाण्याच्या प्रवाहास अडथळा होत आहे. यामुळे नदीचे विद्रुपीकरणही झाले आहे. या कामाचे ठेके जिल्हाधिकाऱ्यांमार्फत दिले आहेत. काम झाल्यानंतर राडारोडा उचलण्याची जबाबदारी असतानाही ठेकेदाराने त्याकडे दुर्लक्ष केले आहे. 

प्रशासनही याबाबत गप्प असून नदीपात्राच्या दुरवस्थेबाबत स्थानिक नागरिक आणि भाविकांकडून नाराजी व्यक्त होत आहे. प्रशासनाच्या हलगर्जीपणामुळेच इंद्रायणीची अवस्था बिकट झाल्याची भावना भाविकांची आहे.

नगरसेवक सचिन गिलबिले यांनी सांगितले, की ‘‘याबाबत जिल्हाधिकारी कार्यालयात तीर्थक्षेत्राबाबत झालेल्या बैठकीत अनेकदा मुद्दा मांडला. मात्र दुर्लक्ष केले. यामुळे तीर्थक्षेत्र विकासातून लाभ किती झाला, यापेक्षा त्रास किती झाला, हेच पाहावे लागेल.’’ इंद्रायणीतील राडारोडा प्रशासनाने ठेकेदाराकडून लवकरात लवकर न उचलल्यास भाविक तसेच स्थानिक नागरिकांसह आंदोलन करण्याचा इशारा गिलबिले यांनी दिला.