आळंदी : सार्वजनिक रस्त्यावर रहदारीस अडथळा निर्माण होईल अशा पद्धतीने रिक्षा उभ्या केल्याप्रकरणी आळंदी पोलिसांनी दोन रिक्षाचालकांवर गुरुवारी (ता. २०) गुन्हा दाखल केला. नगर परिषद चौकातील अरुंद पुलावर ही कारवाई करण्यात आली.
चंद्रकांत शंकर भोसले (वय ५२, रा. भाजी मंडई, आळंदी) आणि संदीप नानासाहेब बोर्डे (वय ४२, रा. रुपीनगर, निगडी) अशी गुन्हा दाखल झालेल्या चालकांची नावे आहेत. पोलिसांनी दिलेल्या माहितीनुसार, गुरुवारी दुपारी १२ च्या सुमारास भोसले यांनी आपली रिक्षा (एमएच १४, केयू ८३४१) आणि बोर्डे यांनी (एमएच १४, एमएस १७९८) आळंदी नगर परिषद चौकातील अरुंद पुलावर उभ्या केल्या होत्या. यामुळे पादचाऱ्यांना आणि इतर वाहनांना धोका व इजा पोहोचण्याची शक्यता निर्माण झाली होती. याप्रकरणी पोलिस शिपाई उमेश सुरवसे आणि पोलिस हवालदार कीर्ती कल्लूरकर यांनी फिर्याद दिली आहे. आळंदी पोलिस या प्रकरणाचा अधिक तपास करत आहेत.