पुणे - ब्रिटिश अधिकारी मेकॉले याच्यामुळे आपली शिक्षण व्यवस्था बिघडली आहे. देशभरातील विद्यापीठांमध्ये संशोधने होतात. त्याचा समाजासाठी किती उपयोग होतो, याचा विचार करावा लागेल. भारताला समृद्ध आणि सशक्त करायचे असेल, तर देशाची सर्व अंगे समृद्ध करावी लागतील, असे मत नागालॅंडचे माजी राज्यपाल पद्मनाथ आचार्य यांनी व्यक्त केले. 

ताज्या बातम्यांसाठी डाऊनलोड करा ई-सकाळचे ऍप

पुणे मराठी ग्रंथालयाच्या वतीने उत्तर प्रदेशचे माजी राज्यपाल राम नाईक यांच्या ‘चरैवेती चरैवेती’ या पुस्तकाला कै. ना. ह. आपटे स्मरणार्थ पुरस्कार, तर डॉ. द. रा. केतकर यांच्या ‘भारतीय नौकानयनाचा इतिहास’ या पुस्तकाला कै. ना. के. बेहेरे पुरस्कार प्रदान करण्यात आला. त्या वेळी आचार्य बोलत होते. नाईक, डॉ. दरेकर यांच्यासह संस्थेचे कार्याध्यक्ष धनंजय बर्वे, डॉ. सुरेश पळसोदकर आणि डॉ. अनुजा कुलकर्णी उपस्थित होते. 

पुणे :..अन् फर्ग्युसन रस्त्याने घेतला मोकळा श्वास

नाईक म्हणाले, ‘‘मुंबईतील एका निवडणुकीत एका केंद्रावर मला फक्त दोन मते मिळाली. ती वस्ती कुष्ठपीडितांची होती. मी निवडून आलो, तर अवैध दारूविक्री करू देणार नाही म्हणून त्यांनी मते दिली नाही. मग त्यांच्यासाठी काही तरी करावे म्हणून प्रयत्न सुरू केला. उत्तर प्रदेशातील तत्कालीन सरकारला सांगून त्यांना अडीच हजार रुपये भत्ता सुरू केला. घरे उभारणीसाठी प्रयत्न केला. महाराष्ट्रातही त्यांच्यासाठी घरे उभारण्याची सूचना मागील सरकारला केली होती. कुष्ठ पीडितांसाठी काम केले, याचा  आनंद आहे.’’
डॉ. केतकर म्हणाले, ‘‘सागरी कथांचे लेखक फार तयार झाले नाहीत. त्यामुळे नौकानयनावर मराठीत फार लेखन नाही म्हणून हा विषय निवडला.’