पुणे - पुण्यातील नाट्यगृहे लॉकडाउनमुळे बंद असल्याने त्यांच्या देखभालीचा भार महापालिकेवर पडू लागला आहे. उंदीर आणि घुशींमुळे नाट्यगृहातील यंत्रणांचे नुकसान होण्याचा धोका निर्माण झाला आहे. या नाट्यगृहापासून मिळणारे आर्थिक उत्पन्नही थांबले असून, चार महिन्यांत सुमारे दोन कोटी रुपयांचा फटका बसला आहे. 

पुण्यात महापालिकेची 14 नाट्यगृहे आहेत. तेथे नाटकांबरोबरच विविध सांस्कृतिक कार्यक्रमही होतात. परंतु, लॉकडाउनमुळे ही सर्व नाट्यगृहे बंद आहेत. तेथील कर्मचारीही कोरोनाविरोधी मोहिमेसाठी काम करीत आहेत. सर्व नाट्यगृहांच्या स्वच्छतेसाठी कंत्राट दिले होते. त्याची मुदत संपल्याने दैनंदिन साफसफाई होत नाही. नाट्यगृहे बंद असली की तिथे उंदरांचा सुळसुळाट वाढू लागतो. त्यासाठी औषध फवारणीची गरज असते. पण, स्वच्छता करणारी एजन्सी नसल्याने उंदरांमुळे साउंड, वातानुकूलन यंत्रणांना उंदरांपासून धोका निर्माण होण्याची शक्‍यता आहे. 

पुण्याच्या बातम्या वाचण्यासाठी येथे क्लिक करा

नाट्यगृहांचे व्यवस्थापक सुनील मते म्हणाले, ""महापालिकेच्या आरोग्य कर्मचाऱ्यांकडून आठवड्यातून एकदा साफसफाई केली जात आहे. उंदरांचा उपद्रव होऊ नये, यासाठी काळजी घेतली जात आहे. एसी यंत्रणा अधूनमधून सुरू केली जाते.'' पुण्यातील 14 नाट्यगृहांमधून वर्षाकाठी सहा कोटी रुपयांचे उत्पन्न गृहीत धरलेले असते. नाटकाला कमी भाडे आहे. इतर सांस्कृतिक कार्यक्रमांसाठी 10 हजार रुपये आकारले जातात. परंतु, लॉकडाउनमुळे नाट्यगृहे बंद असल्याने हे उत्पन्न थांबले आहे. स्वच्छतेचा खर्च मात्र सुरू आहे, असेही मते यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप 

संवाद पुणे संस्थेचे सुनील महाजन म्हणाले, ""स्वच्छतेच्या कामाचे कंत्राट संपल्याने नाट्यगृहांची दैनंदिन साफसफाई होत नाही. वॉचमनवर झाडू मारण्याची वेळ आली आहे. साउंड, वातानुकूलन यंत्रणेत बिघाड होण्याची शक्‍यता आहे. नाट्यगृहे बंद असल्याने दीड-दोन कोटी रुपये आर्थिक उत्पन्न बुडाले आहे.''