पुणे : आंबेगाव येथील कचरा डेपो प्रकल्पाला स्थानिक नागरिक व राजकीय व्यक्तींनी आग लावल्याचा धक्कादायक प्रकार घडला. संबंधित व्यक्तींनी कचरा डेपोला आग लावण्याबरोबरच तेथील कार्यालयाचीही तोडफोड केली. ही घटना रविवारी दुपारी सव्वा दोन वाजता घडली. घटनेनंतर अग्निशामक दलाच्या पाच बंबांच्या मदतीने अग्निशामक दलाच्या अधिकारी व जवानांकडून आग विझविण्यासाठी उशीरापर्यंत प्रयत्न सुरू होते. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

अग्निशामक दलाच्या मध्यवर्ती केंद्राला रविवारी दुपारी सव्वा दोन वाजता आंबेगाव येथील कचरा डेपोला आग लागल्याची खबर मिळाली. त्यानंतर सिंहगड अग्निशामक दलाचे अधिकारी प्रभाकर उमराटकर त्यांच्या जवानांसह काही मिनिटातच घटनास्थळी दाखल झाले. मात्र आग मोठ्या प्रमाणात असल्यामुळे त्यांच्या मदतीला कात्रज अग्निशामक केंद्राचे संजय रामटेके व कोंढवा अग्निशामक केंद्राचे अधिकारी समीर शेख त्यांच्या पथकासह घटनास्थळी पोचले.

तीन अधिकारी व पंधरा जवानांकडून आग विझविण्यास सुरवात झाली. परंतु कचरा, प्लॅस्टिकमुळे आग वाढत होती. त्यावर अग्निशामक दलाच्या तीन बंबानी पाण्याचा मारा केला. त्यानंतर एक ते दोन तासांनी आगीवर नियंत्रण आले. तरीही धूर मोठ्या प्रमाणात असल्याने अग्निशामक दलाच्या अधिकाऱ्यांनी जेसीबी यंत्र मागविला. त्याच्या मदतीने आग विझविण्यात येऊ लागली. 

...तर मग संमतीनेच घटस्फोट घेऊ; कोरोनाने बदलला जोडप्यांचा कल!

काही स्थानिक नागरिक व राजकीय व्यक्तींनीच कचरा डेपोला आग लावली, त्याचबरोबर कचरा डेपोच्या कार्यालयाची तोडफोड केल्याचा आरोप नागरिकांनी केला. या तोडफोडीमध्ये कार्यालयातील कॉम्प्युटर, टीव्ही, खुर्च्या, काचेच्या खिडक्‍या व फर्निचरचे नुकसान झाले. या घटनेनंतर पोलिसही घटनास्थळी दाखल झाले.