महाळुंगे पडवळ (पुणे) : आंबेगाव तालुक्‍यातील कळंब परिसरात ऊस तुटून गेल्याने बिबट्याचे लपण नष्ट झाले आहे. येथील शिरामळा येथे बिबट्यांनी हल्ला करून शेळ्या, मेंढ्या व पाळीव कुत्री ठार केली होती. या धुमाकूळ घातलेल्या बिबट्याला गुरुवारी (ता. 7) पहाटे जेरबंद करण्यात वनविभागाच्या अधिकाऱ्यांना यश आले.
कळंब परिसरातील ऊस तुटून गेल्याने बिबट्याचे लपण नष्ट झाले आहे. पंचक्रोशीतील पाळीव कुत्री, धनगरांची बकरी व घोडी यावर बिबट्याने हल्ले करून ठार केले होते. अनेकवेळा शेतकऱ्यांना रात्री अपरात्री बिबट्याने दर्शन दिले होते. तसेच, शेतीला पाणी भरण्यासाठी गेल्यानंतर बिबट्याच्या डरकाळ्यांचा आवाज येत असे. त्यामुळे शेतकऱ्यांमध्ये भीतीचे वातावरण पसरले होते. वनविभागाने बिबट्याला जेरबंद करण्यासाठी पिंजरा लावावा, अशी मागणी सरपंच राजश्री भालेराव व उपसरपंच डॉ. सचिन भालेराव यांनी केली होती.
वनविभागाने राजेंद्र दत्तात्रेय कानडे यांच्या शेतात तोंडल्याच्या बागेजवळ तीन दिवसांपूर्वी पिंजरा लावला होता. पिंजऱ्यात सावज म्हणून सहा ते सात कोंबड्या ठेवल्या होत्या. या पिंजऱ्यात गुरुवारी पहाटे बिबट्या जेरबंद झाला. वनपाल एन. एम. आरुडे, वनरक्षक के. के. दाभाडे, राजेंद्र गाढवे, कर्मचारी कोंडीभाऊ डोके यांनी घटनास्थळी भेट देऊन बिबट्याला ताब्यात घेतले. या बिबट्याला माणिकडोह येथील निवारा केंद्रात सोडण्याची व्यवस्था वनखात्यामार्फत करण्यात आली. एक ते दीड वर्ष वयाचा हा बिबट नर जातीचा आहे, असे वनरक्षक के. के. दाभाडे यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.