विश्रांतवाडी (पुणे) : येरवड्यात गर्भवतीला वेळेवर रुग्णवाहिका उपलब्ध न झाल्यामुळे स्थानिक नगरसेविका व त्यांच्या पतीच्या मदतीने खासगी वाहनाने रुग्णालयात नेण्यात आले. त्यामुळे वेळेत पोहोचल्याने महिलेची सुखरूप प्रसूती झाली. मात्र या घटनेमुळे कंटेनमेंट झोनमधील रुग्णांसाठी आवश्यक रुग्णवाहिका व इतर सोयी सुविधा यांचा अनागोंदी कारभार पुन्हा एकदा चव्हाट्यावर आला आहे.  

कोथरूडमध्ये गुंडांचा धुडगूस; पोलिसांच्या डोक्याला ताप

शनिवारी पहाटे सुनंदा गजभिये या गर्भवतीला प्रसूति वेदना सुरू झाल्या, परंतु रुग्णवाहिका उपलब्ध नसल्यामुळे मोठा प्रसंग निर्माण झाला होता. स्थानिक नगरसेविका श्वेता चव्हाण यांनी महापालिका यंत्रणेशी संपर्क करून देखील रुग्णवाहिका उपलब्ध झाली नाही. अशावेळी पती अनिल उर्फ श्री चव्हाण यांच्या मदतीने  त्यांच्या खासगी वाहनातून गर्भवतीला तत्काळ ससून रुग्णालयात नेण्यात आले. वेळेत रुग्णालयात पोहोचल्यामुळे अवघ्या अर्ध्या तासात गर्भवती महिला सुखरूप बाळंतीण होऊन तिने एका मुलीला जन्म दिला आहे.

पुण्यात खडकीत ठोकलाय कोरोनानं तळ; काय घडलं? कसं घडलं?

नगरसेविका श्वेता चव्हाण व त्यांचे पती यांनी केलेल्या बहुमोल सहकार्याबद्दल गजभिये दांपत्याने त्यांचे आभार मानले. शुक्रवारीच महापौर मुरलीधर मोहोळ यांनी येरवड्यातील कोरोनाच्या वाढत्या संख्येबाबत स्थानिक लोकप्रतिनिधी व अधिकाऱ्यांची बैठक घेतली होती. गर्भवती महिलांसह येरवड्यातील अत्यावश्यक सेवेसाठी रुग्णवाहिका उपलब्ध नसल्याचे नगरसेविका श्वेता चव्हाण यांनी महापौर व प्रशासनाच्या निदर्शनास बैठकीत आणून दिले होते. महापालिकेच्या  या अनागोंदी कारभारामुळे गर्भवती महिला अथवा एखाद्या गंभीर रुग्णाला वेळेवर रुग्णवाहिका उपलब्ध न झाल्यास त्याला आपला बहुमोल जीव गमवावा लागू शकतो. परंतु महापालिका आरोग्य विभाग याबाबतीत दिरंगाई करत असल्याचे या घटनेमुळे पुन्हा एकदा स्पष्ट झाले आहे. 

सोनं खातंय भाव; अहो ही तर, गुंतवणुकीची `सुवर्ण`संधी

येरवडा क्षेत्रीय कार्यालयामध्ये सध्या दोन रुग्णवाहिका उपलब्ध आहेत. कोरोना रुग्णासाठी एक व इतर रुग्णांसाठी दुसरी रुग्णवाहिका उपलब्ध करण्यात आली आहे. मात्र या रुग्णवाहिका वेळेवर उपलब्ध होत नसल्याची नागरिकांची तक्रार आहे. अशावेळी रुग्णाच्या जीवितास धोका निर्माण होऊ शकतो, महापालिका प्रशासनाने याची तात्काळ दखल घेऊन स्वतंत्र रुग्णवाहिका उपलब्ध करून देण्याची मागणी नगरसेविका श्वेता चव्हाण यांनी महापालिका आयुक्त व महापौर यांच्याकडे केली आहे. 

पुण्याच्या इतर बातम्या वाचण्यासाठी येथे-क्लिक करा
 

"कंटेनमेंट भागात रुग्णवाहिका उपलब्ध नसल्यामुळे रुग्णांचे हाल"

पुणे महापालिका तसेच इमर्जन्सी मेडिकल सर्विसेस(108) साठी उपलब्ध असणाऱ्या रुग्णवाहिका शहरात सध्या वेळेवर उपलब्ध होत नाहीत . त्यामुळे रुग्णांचे हाल होत असल्याचे प्रकार वारंवार घडत आहेत. महापालिका प्रशासन तसेच आरोग्य विभाग याबाबतीत कोणत्याही प्रकारची दखल घेत नाही. कंटेनमेंट झोनमधील दाट लोकवस्तीच्या झोपडपट्टी परिसरात नागरिक त्यांची खासगी वाहने बाहेर काढू शकत नाहीत. तसेच रुग्णवाहिकादेखील आत येऊ शकत नाही. या परिसरात रिक्षा किंवा मिनी रुग्णवाहिका उपलब्ध करून देणे आवश्यक आहे. महापालिका प्रशासनाने तात्काळ नोंद घेऊन मिनी रुग्णवाहिका तसेच स्थानिक काही रिक्षांना परवानगी  घेऊन उपलब्ध केल्यास स्थानिक रुग्णांना रुग्णालयात पोहोचविण्यासाठी मदत होईल.', असे श्री. चव्हाण म्हणाले.