पुणे : महापालिकेची निवडणूक (Corporation Election) काही महिन्यांवर येऊन ठेपलेली असताना भाजपचे नेते केंद्रीय गृहमंत्री अमित शहा (Amit Shaha)उद्या (रविवारी) पुण्यात असल्याने भाजपने (BJP) शक्तीप्रदर्शन करण्यासाठी जोरदार तयारी केली आहे. महापालिकेतील कार्यक्रमासह गणेश कला क्रीडा मंच येथी मेळाव्यात अमित शहा काय बोलणार याकडे लक्ष लागलेले आहे.

नोव्हेंबर महिन्यात अमित शहा यांचा दौरा होणार होता, पण तो अचानक पुढे ढकलण्यात त्यानंतर हा दौरा रविवारी होत आहे. आज (शनिवारी) रात्री शहा पुण्यात मुक्कामी आहेत. रविवारी सकाळी १० वाजता श्रीमंत दगडूशेठ हलवाई गणपतीचे दर्शन, त्यानंतर चाकण येथील एनडीआरएफचा कार्यक्रमाला शहा उपस्थित राहणार आहेत. दुपारी वैकुंठ मेहता राष्ट्रीय सहकार संस्थेच्या कार्यक्रम झाल्यानंतर पुणे महापालिकेत छत्रपती शिवाजी महाराज स्मारकाचे भूमीपुजन आणि डॉ. बाबासाहेब आंबेडकर यांच्या पुतळण्याच्या लोकर्पण शहा यांच्या हस्ते होणार आहे.

भाजप कार्यकर्त्यांचा मेळावा गणेश कला क्रीडा मंच येथे आयोजित केला असून, त्यात शहा हे मार्गदर्शन करणार आहेत. त्यामुळे पक्षाकडून तसेच नगरसेवक व इच्छुक उमेदवरांकडून जोरदार शक्तीप्रदर्शन करण्याची तयारी सुरू केली आहे. हा कार्यक्रम संपल्यानंतर शिवशाहीर बाबासाहेब पुरंदरे यांच्या कुटुंबियांचे सांत्वन करण्यासाठी शहा पर्वती पायथा येथील घरी जाणार आहेत.

दरम्यान, महापालिकेची निवडणूक जवळ येत असताना भाजपने संघटनात्मक बांधनी सुरू केली आहे. तसेच नुकतेच पक्षाच्या नव्या कार्यालयच्या उद्घाटनप्रसंगी विरोधीपक्षनेते देवेंद्र फडणवीस, प्रदेशाध्यक्ष चंद्रकांत पाटील यांनी महाविकास आघाडीला लक्ष करत पराभव करून दाखवा असे आव्हान दिलेले आहे. त्यानंतर आता अमित शहा हे भाजप कार्यकर्त्यांना मार्गदर्शन करणार असल्याने यानिमित्ताने निवडणुकीचे रणशिंग फुंकले जाणार आहे.

शहराध्यक्ष मुळीक यांच्या घरी जेवण

शासकीय व राजकीय कार्यक्रम संपल्यानंतर सायंकाळी साडे सातच्या सुमारास अमित शहा हे भाजपचे शहराध्यक्ष जगदीश मुळीक यांच्या वडगाव शेरी येथील घरी जेवणासाठी जाणार आहेत. पक्षाचे काही नगरेसवक व पदाधिकार उपस्थित रहाणार आहेत. अमित शहा घरी येणार असल्याने मुळीक कुटुंबियांनी जय्यैत तयारी सुरू केली आहे. यावेळी मराठमोळ्या पद्धतीचे जेवण असणार असल्याचे निकटवर्तीयांनी सांगितले.