हडपसर : महानायक अमिताभ बच्चन यांच्या ८० व्या वाढदिवसानिमित्त त्यांच्या विविध भावमुद्रा सुमारे दोन हजार फुटांच्या रांगोळी प्रदर्शनात साकारण्यात आल्या आहेत. बच्चन यांचे चहाते असलेले सासवड येथील राष्ट्रीय पुरस्कार विजेते, थ्रीडी रांगोळी कलाकार सोमनाथ भोंगळे यांनी ही कलाविष्कार सादर केला आहे. येथील एस. एम. जोशी महाविद्यालयात भरविण्यात आलेल्या या प्रदर्शनाचे आमदार चेतन तुपे पाटील यांच्या हस्ते उद्घाटन झाले.

सासवड नगरपरिषदेच्या नगरसेवक सीमा भोंगळे, प्राचार्य डॉ. नानासाहेब गायकवाड तसेच डॉ. शंतनु जगदाळे, अमर तुपे, सुनील बनकर, संजय शिंदे, अविनाश काळे, शीतल शिंदे आदी यावेळी उपस्थित होते.

अमिताभ बच्चन यांच्या विविध चित्रपटातील व्यक्तीरेखा व भावमुद्रांचा अविष्कार या रांगोळीत साकारण्यात आला आहे. सहकलाकार मयुर दुधाळ, प्रिया दुधाळ, अभिषेक शिंदे, रिया भोंगळे, मनाली गायकवाड, शुभम मोरे यांच्यासह एकूण १७ विद्यार्थी कलाकारांनी या कलाकृती प्रदर्शनातून महानायक बच्चन यांना शुभेच्छा दिल्या आहेत. विद्यार्थी व पालकांचा या प्रदर्शनाला मोठा प्रतिसाद मिळत आहे.

या अविष्कारासाठी बाराशे किलो रांगोळीचा वापर करण्यात आला असून ती साकारण्यासाठी कलाकारांना पाच दिवसांचा कालावधी लागला. हे रांगोळी प्रदर्शन पाहण्यासाठी पुढील चार दिवस सकाळी १० ते रात्री ८ या वेळेत सर्वांसाठी खुले ठेवण्यात आले आहे, अशी माहिती प्राचार्य डॉ. नानासाहेब गायकवाड यांनी दिली.

रांगोळी कलाकार भोंगळे यांचे शिक्षण

कोल्हापूर व पुणे येथील अभिनव कला महाविद्यालयात कलाशिक्षण झाले आहे. अमिताभ बच्चन यांच्या प्रमाणेच दरवर्षी आषाढी वारीनिमित्त सासवड येथे ते रांगोळी प्रदर्शन भरऊन वारकऱ्यांचे वेगवेगळे हावभाव व प्रसंगचित्र ते रेखाटत असतात. त्यांनी रांगोळीमध्ये आत्तापर्यंत पाच जागतिक विक्रम केले असून चाळीस हजार चौरस फूट एवढी सर्वात मोठी थ्रीडी रांगोळी काढली आहे. हडपसर येथील हे त्यांचे आठरावे प्रदर्शन आहे.