कॅन्टोन्मेंट - 'लोकशाहीर अण्णाभाऊ साठे यांचे योगदान अतुलनीय आहे. त्यांचे साहित्य, शाहिरी, कामगार चळवळीतील कार्य, वाटेगाव ते मुंबई, रशिया असा झालेला प्रवास अचंबित करणारा आहे. त्यांना 'भारतरत्न' पुरस्कार देण्याची मागणी अनेक वर्षांपासून प्रलंबित आहे. अण्णाभाऊंना भारतरत्न मिळण्यासाठी मी स्वतः पाठपुरावा करणार असून, लवकरच पंतप्रधान नरेंद्र मोदी व गृहमंत्री अमित शहा यांच्याशी चर्चा करणार आहे," असे आश्वासन केंद्रीय सामाजिक न्याय राज्यमंत्री व रिपब्लिकन पार्टी ऑफ इंडियाचे (आठवले) राष्ट्रीय अध्यक्ष रामदास आठवले यांनी दिले.

अण्णाभाऊ साठे यांच्या १०४ व्या जयंतीनिमित्त सारसबाग परिसरात मातंग समाज समन्वय समिती पुणे यांच्यातर्फे अभिवादन सोहळ्याचे आयोजन केले होते. प्रसंगी आठवले यांच्या हस्ते पहिला 'स्वर्गीय हनुमंतराव साठे सामाजिक कार्यकर्ता पुरस्कार' रिपाइं नेते बाळासाहेब जानराव यांना प्रदान करण्यात आला. यावेळी ते बोलत होते.

यावेळी अध्यक्षस्थानी ज्येष्ठ नेते भीमराव पाटोळे, 'रिपाइं'चे शहराध्यक्ष संजय सोनावणे, डॉ. सिद्धार्थ धेंडे, अशोक कांबळे, अशोक शिरोळे, मातंग आघाडीचे वीरेन साठे, रवींद्र आरडे, प्रकाश वैराळ, दत्ता जाधव, राजाभाऊ दडे, जनार्दन वाघमारे, सचिन बगाडे, विकास सातारकर, प्रदीप कांबळे, सुनील खंडाळे, निलेश वाघमारे आदी उपस्थित होते. अण्णाभाऊंच्या पूर्णाकृती पुतळ्याला पुष्पहार अर्पण करून आठवले व कार्यकर्त्यांनी अभिवादन केले.

यापुढे आठवले म्हणाले, 'सामाजिक परिवर्तनाला साहित्यातून बळ देणारे अण्णाभाऊ साहित्यात क्रांती केली. त्यांनी लिहलेली लावणी, शाहीरी, गीते, कथा, कादंबरी आणि पुस्तके समाजाला दिशादर्शक आहेत. संयुक्त महाराष्ट्र चळवळीतील त्यांचे योगदान महत्वपूर्ण राहिले आहे.' डॉ. बाबासाहेब आंबेडकर आणि अण्णाभाऊंच्या विचारांवर चालणारा हनुमंत साठे हा आमचा शिलेदार अकाली गेला. समाजाला बांधण्याचे काम त्यांनी केले होते. त्यांच्या नावाचा पुरस्कार सुरु झाला, याचा आनंद वाटतो, असेही आठवले यांनी नमूद केले.