सोमेश्वरनगर, ता. ७ : राज्य सरकारच्या वतीने ''साहित्यरत्न लोकशाहीर अण्णा भाऊ साठे चरित्र साधने प्रकाशन समिती''चे पुनर्घटन करण्यात आले आहे. यामध्ये बारामती तालुक्यातील डॉ. देविदास वायदंडे व निवृत्त मुख्याध्यापक सोपान खुडे या दोन अभ्यासकांची समितीत निवड करण्यात आली आहे.
महाराष्ट्र राज्य शासनाच्या उच्च व तंत्र शिक्षण विभागाच्या वतीने लोकशाहीर अण्णा भाऊ साठे यांचे साहित्य तळागाळात पोहोचविण्यासाठी अभ्यास समितीची तीन वर्षांसाठी रचना करण्यात आली आहे. उच्च व तंत्र शिक्षण मंत्र्यांच्या अध्यक्षतेखाली राज्यातून २७ जणांची समितीत वर्णी लागली आहे. यामध्ये मु. सा. काकडे महाविद्यालयाचे प्राचार्य डॉ. देविदास वायदंडे व कोऱ्हाळे खुर्द येथील लेखक सोपान खुडे यांचा समावेश करण्यात आला आहे. डॉ. वायदंडे यांनी लोकशाहीर अण्णा भाऊ साठे यांच्या शाहिरीच्या अंगाने विपुल संशोधन केलेले असून त्यांचा संशोधन ग्रंथही प्रसिद्ध आहे. तर खुडे यांनी पाच पुस्तकांचे लेखन केले आहे. अण्णा भाऊ साठे यांचे साहित्य जनतेपर्यंत पोहोचवणे आणि त्यांच्या दुर्मिळ, अपरिचित साहित्याचा शोध घेणे हे काम समिती करणार आहे.