अण्णाभाऊंच्या जीवनकार्यावर
सोमवारी आंतरराष्ट्रीय मंथन
देश-विदेशातील अभ्यासक मांडणार विचार
सकाळ वृत्तसेवा
सोलापूर, ता. २४ : वसुंधरा कला महाविद्यालय, जुळे सोलापूर आणि पुण्यश्लोक अहिल्यादेवी होळकर सोलापूर विद्यापीठांतर्गत लोकशाहीर अण्णा भाऊ साठे अध्यासन केंद्राच्या संयुक्त विद्यमाने सोमवारी (ता. ३१) ‘साहित्यरत्न डॉ. अण्णा भाऊ साठे : जीवन व कार्य’ या विषयावर एकदिवसीय आंतरराष्ट्रीय परिषदेचे आयोजन करण्यात आले आहे.
अण्णाभाऊंयांच्या साहित्य, विचार व सामाजिक कार्याचा जागतिक संदर्भातून अभ्यास करण्यासाठी हे परिषद होणार आहे. शाहू शिक्षण संस्थेचे संस्थापक अध्यक्ष प्रा. डॉ. लक्ष्मणराव ढोबळे यांच्या हस्ते परिषदेचे उद्‌घाटन होईल. विद्यापीठाचे कुलगुरू प्रा. डॉ. कर्नल प्रकाश महानवर अध्यक्षस्थानी असतील. अमेरिकेतील इलिनॉय विद्यापीठाच्या प्रा. फेय व्ही. हॅरिसन बीजभाषण ऑनलाइन करतील. संस्थेचे सचिव अभिजित ढोबळे, अध्यक्ष अब्राहम आवळे व प्राचार्य डॉ. दिगंबर झोंबाडे उपस्थित राहणार आहेत.
चारसत्रात होणाऱ्या परिषदेत मानवतावाद, अण्णाभाऊंचे विविधांगी चिंतन आणि चित्रपटसृष्टीतील योगदान या विषयांवर अभ्यासक मार्गदर्शन करणार आहेत. चौथ्या सत्रात खुले चर्चासत्र होणार असून संशोधक शोधनिबंध सादर करतील. अण्णाभाऊंचे पुरोगामी साहित्य, लोककला आणि सामाजिक विचार जागतिक स्तरावर पोहोचविण्याच्या उद्देशाने ही परिषद होत आहे. प्राध्यापक, संशोधक, लेखक, विचारवंत, विद्यार्थी व साहित्यप्रेमींनी सहभागी व्हावे, असे आवाहन आयोजकांनी केले आहे.