पुणे - देशाच्या पायदळ, नौदल आणि हवाई दलाच्या प्रमुखांनी एकत्रितपणे खडकवासला (Khadakwasala) येथील राष्ट्रीय संरक्षण प्रबोधिनीला (एनडीए) (NDA) नुकतीच भेट दिली. त्यात त्यांनी `एनडीए’च्या प्रशिक्षणार्थींना मार्गदर्शन केले.

नौदल प्रमुख अॅडमिरल करमबीर सिंग यांनी आधुनिक युद्धनितीच्या नव्या प्रवाहांवर भाष्य केले. तसेच विद्यार्थ्यांना आधुनिक लष्करी नेतृत्वाचे प्राथमिक धडे आत्मसात करण्याचा सल्ला दिला. नौदल प्रमुखांसह हवाई दल प्रमुख एअर चीफ मार्शल राकेश कुमार सिंग भदुरीया आणि लष्करप्रमुख जनरल मनोज नरवणे यांनीही विद्यार्थ्यांशी संवाद साधला. तसेच तिन्ही दल प्रमुखांनी देशासाठी लढताना आपल्या प्राणांची आहुती दिलेल्या माजी एनडीए अधिकाऱ्यांच्या स्मारकाला भेट देत श्रद्धांजली वाहिली. या भेटीमुळे तिन्ही दलाच्या प्रशिक्षणार्थींमध्ये बंधुत्वाची भावना निर्माण होईल. तसेच आपल्या कारकिर्दीत सर्वोच्च यश मिळवण्याची प्रेरणा त्यांना मिळेल, असा आशावाद ‘एनडीए’च्या अधिकाऱ्यांनी व्यक्त केला.

अॅडमिरल करमबीर सिंग (नौदल प्रमुख), एअर चीफ मार्शल राकेश कुमार सिंग भदुरीया (हवाईदल प्रमुख) आणि जनरल मनोज नरवणे (लष्करप्रमुख) हे तिघेही एनडीएचे पूर्वाश्रमीचे सहाध्यायी होते. ‘एनडीए’चेच विद्यार्थी तिन्ही दल प्रमुख असण्याचा हा १९९१ नंतरचा केवळ दुसराच प्रसंग आहे.