पुणे - पहिल्या महायुद्धापासून रणगाड्यांचा वापर लष्करी मोहिमेसाठी केला जात आहे. बदलत्या काळात येणाऱ्या नवनवीन तंत्रज्ञानाचा वापर लष्करी मोहिमांसाठी केला जात आहे. त्यामुळे रणगाड्यांनी आपले महत्त्व आणि उपयुक्तता सिद्ध केली आहे. शंभर वर्षांनंतरही रणगाड्यांचे महत्त्व कमी झालेले नसून, कोणत्याही परिस्थितीत ते कालबाह्य होणार नाहीत, असे मत आर्म्ड कोर अँड स्कूल अँड मॅकेनाइज्ड इनफंटरी रेजिमेंटल सेंटरचे प्रमुख मेजर जनरल एस. झा यांनी सोमवारी येथे व्यक्त केले.

नगर येथील के. के. रेंज या ठिकाणी सोमवारी रणगाड्यांच्या युद्धसरावचे आयोजन करण्यात आले होते, त्यानंतर ते पत्रकारांशी बोलत होते.

ताज्या बातम्यांसाठी डाऊनलोड करा ई-सकाळचे ऍप

मेजर जनरल झा म्हणाले, ‘‘तोफांचा मारा करण्याची क्षमता, संरक्षण आणि गतिशीलता या तीन बाबतीत रणगाडे युद्धात महत्त्वाची भूमिका निभावतात. युद्धभूमीवर रणगाड्यांचा वापर करून, लष्करी मोहीम यशस्वी करण्यासाठी सैनिकांचे मनोधैर्य आणि कौशल्य सर्वोच्च दर्जाचे असणे महत्त्वाचे आहे. त्यादृष्टीने भारतीय लष्कराकडून सातत्याने प्रयत्न केले जातात. दहशतवादी कारवायांचा बीमोड करताना तसेच शत्रुराष्ट्रांच्या सीमारेषेवर संरक्षणाच्या दृष्टीने रणगाड्यांचा चांगल्या प्रकारे वापर होऊ शकतो. त्याद्वारे सैन्याला अधिक सुरक्षा मिळू शकते तसेच आणीबाणीच्या परिस्थितीवर मात करणे शक्‍य होते. सैनिकांना अधिक चांगल्या प्रकारे प्रशिक्षण देण्यासाठी के. के. रेंज परिसर विस्तारीकरण प्रस्ताव शासनाला सादर करण्यात आला असून, त्याबाबत आम्ही प्रयत्नशील आहे.’’

पुणे शहरात प्राणांतिक अपघातात १८ टक्‍क्‍यांनी घट

भारतीय सैन्यदलाचे प्रशिक्षण दर्जेदार
भारतीय लष्कराच्या कर्तृत्वाला जोड देणारे रणगाडे आणि इतर लष्करी साधनसामग्रीबाबत भारत आणि पाकिस्तान या दोन देशांचे संख्याबळ थोडेफार सारखे आहे. मात्र, भारतीय लष्कराला मिळणारे प्रशिक्षण पाकिस्तानच्या तुलनेत दर्जेदार आणि अद्ययावत असल्यामुळे तसेच आपल्या सैनिकांचे मनोबल उच्च दर्जाचे असल्याने भारतीय सैन्यदले सक्षम ठरतात, असे मत झा यांनी या वेळी व्यक्त केले.