पुणे : बहिणीसोबत आंतरजातीय विवाह केल्याच्या कारणावरून मेव्हण्यावर गोळीबार करणाऱ्या तिघा आरोपींना गुन्हे शाखेच्या युनिट चारच्या पथकाने अटक केली.

आकाश लहू तावरे (वय 22),  सागर लहू तावरे (वय 24) आणि सागर रामचंद्र पालवे (वय 21, तिघे रा. राजे, ता. भोर) अशी अटक केलेल्यांची नावे आहेत.
तुषार प्रकाश पिसाळ (वय 20 रा. राजेगाव ता. भोर) याचा आरोपीच्या बहिणी समवेत झाला आहे. मुलीच्या नातेवाईकांचा या लग्नाला विरोध होता. त्यांच्यात यापूर्वी वाद असल्यामुळे तुषारला मुलीच्या नातेवाईकांकडून सतत जीवे मारण्याच्या धमक्या येत होत्या. बहिणीने आंतरजातीय विवाह केल्याचा राग मनात धरून मुलीचा भाऊ आकाश तावरे आणि सागर तावरे, चुलत भाऊ राजू तावरे आणि त्याचा मित्र सागर पालवे यांनी संगनमत करून तुषारवर चांदणी चौकात गोळीबार करून गंभीर जखमी केले होते. याप्रकरणी हिंजवडी पोलीस चार जणांविरुद्ध गुन्हा दाखल करण्यात आला आहे.

गोळीबार केल्यानंतर आरोपी बाहेर गावी पळून जाण्याच्या तयारीत असताना युनिटच्या पथकातील पोलीस हवालदार सुनिल पवार यांना आरोपी जंगली महाराज रस्त्यावरील संभाजी उद्यानाजवळ असल्याची माहिती मिळाली. त्यावरून गुन्हे शाखेचे सहाय्यक पोलिस आयुक्त भानुप्रताप बर्गे, युनिट चारचे पोलिस निरीक्षक अंजुम बागवान यांच्या पथकातील कर्मचाऱ्यांनी आरोपींना ताब्यात घेतले.