महाराष्ट्रातील वस्तू आणि सेवाकर विभागाने राबवलेल्या एका तपास मोहिमेमध्ये ओलायन डेस्कॉन कंपनीच्या विरोधात गुन्हा दाखल करण्यात आला आहे. जीएसटी विभागाच्या पुण्यातल्या टीमने ही कारवाई केली आहे. या कंपनीचे चार मुख्य पुरवठादार बनावट असल्याचं आढळून आलं आहे.

या चार पुरवठादारांनी बनावट कागदपत्रांच्या माध्यमातून फसवणूक करत आपली जीएसटी नोंदणी केली आहे. याप्रकरणी या पुरवठादारांची वेगवेगळ्या ठिकाणी चौकशी झाली. यामध्ये असं आढळून आलं की, सिराजुद्दीन कमालुद्दिन चौधरी, वय - २९ वर्षे यांनी सामानाच्या मूळ पावतीशिवाय ७०.२२ कोटी रुपयांची बनावट बिल्स सादर केली आहेत. तसंच ओलायन डेस्कन कंपनीमध्ये १२.५९ कोटींचं बनावट इनपूट टॅक्स क्रेडिट दाखवलं आहे.

सिराजुद्दीन हा फरार होता, आणि उत्तर प्रदेशात लपला होता. त्याला पकडण्यासाठी विशेष तपास पथक तयार करुन उत्तर प्रदेशात पाठवण्यात आलं. त्याला उत्तर प्रदेश पोलिसांच्या मदतीने शोधण्यात आलं आणि १० मार्च २०२३ रोजी त्याला अटक केली. मुख्य न्यायदंडाधिकारी सिद्धार्थनगर, उत्तर प्रदेश यांनी ट्रान्झिट रिमांड अंतर्गत मुख्य न्यायदंडाधिकारी पुणे यांच्यासमोर हजर केले. आरोपीला १४ दिवसांची न्यायालयीन कोठडी सुनावण्यात आली.

ही कारवाई जीएसटी विभागाच्या पुणे शाखेचे अतिरिक्त आय़ुक्त धनंजय आखाडे, सहआयुक्त दीपक भंडारे आणि उपायुक्त मनिषा गोपाले भोईर यांनी केली. राज्य आयकर विभागाचे सहाय्यक आयुक्त सचिन सांगळे, दत्तात्रय तेलंग, सतिश लंके आणि सतिश पाटील यांच्या नेतृत्वाखाली ही कारवाई झाली. यांच्यासोबत इतरही काही आयकर विभागाचे अधिकारी या कारवाईमध्ये सहभागी झाले होते.

२०२२ -२३ या वर्षातली महाराष्ट्र जीएसटी विभागाने केलेली ही ६८ वी अटक आहे. आरोपी जरी दुसऱ्या राज्यामध्ये लपलेला असता, तरीही विभागापासून वाचू शकत नाही, असा इशारा या अटकेच्या माध्यमातून देण्यात येत आहे. या आधीही विभागाने अशा प्रकारची कारवाई करत आरोपींना गुजरात, गोवा अशा राज्यांतून ताब्यात घेतलं आहे.