पुणे : शहरातुन अपहरण झालेल्या मुलाच्या वडीलांना मुलाची माहिती देतो, असे सांगून त्यांच्याकडे 2 लाख रुपयांची खंडणी मागणाऱ्यास गुन्हे शाखेच्या पथकाने अटक केली.

आनंद उर्फ अक्षय हनुमंत शिर्के (वय 27, रा. आळंदवाडी, ता. भोर) असे अटक केलेल्या तरुणाचे नाव आहे. काही दिवसांपुर्वी शहरातून एका लहान मुलाचे अपहरण झाले आहे. त्याचा तपास पुणे पोलिसांकडून केला जात आहे. दरम्यान, मुलाची माहिती मिळावी, यासाठी त्याच्या पालकांनी फेसबुकवर नागरीकांना आवाहन केले आहे. त्यानुसार, शिर्के याने संबंधित माहिती वाचून मुलाच्या वडीलांच्या व्हॉटस्‌अपवर मेसेज केला.

त्यांना मुलाची व त्याला घेऊन जाणाऱ्या गाडीची माहिती पाठवतो असे सांगून त्यांच्याकडे 2 लाख रुपयांची मागणी केली. त्यांनी आगोदर माहिती व फोटो देण्याची मागणी केली, तेव्हा त्याने आगोदर पैशांची मागणी केली, असे मुलाच्या पालकांना सांगितले. त्यानंतर सहाय्यक पोलिस आयुक्त गजानन टोम्पे यांच्या मार्गदर्शनाखालील पथकाने संबंधित तरुणाचा माग काढला. त्यानंतर त्यास भोरमधील आळंदवाडी येथून अटक केली. शिर्के हा आळंद येथील कंपनीत काम करत असून त्याचे पदवीपर्यंतचे शिक्षण झाले आहे. पोलिसांनी त्याच्याविरुद्ध खंडणीचा गुन्हा दाखल केला आहे.मुलाच्या अपहणामुळे संबंधित कुटुंब चिंतेत आहे. असे असतानाही खोटी माहिती देऊन त्यांच्याकडे पैसे मागण्याचे कृत्य बेकायदेशीर आहे. अशा प्रकारच्या खोट्या माहितीचे फोन करुन त्यांना त्रास देऊ नये, असे पोलिसांनी आवाहन केले आहे.